American business magazine Forbes chuan World Highest-Paid Entertainer 2022 list a tichhuak a, top 10-ah Taylor Swift leh Bad Bunny te an lang. Genesis leh Sting te chuan pakhatna leh pahnihna an luah a, top 10 te sum lakluh belhkhawm hi $tld 1.3 khat zet a tling a ni. 

Milarte hian sum an lalut hnem thin khawp mai a, kum khat chhunga an sum dehchhuah hi namai lo tak a ni. Nikum chhunga sum lalut hnem ber English rock band Genesis chuan $mtd 230 zet an lalut a, Sting chuan $mtd 210 zet a lalut ve bawk. Genesis hian nikum September thla khan Concord Music Group hnenah music rights chu $mtd 300 zetin an hralh a, dinhmun sang ber an luah theih phah. 

English musician leh actor ni bawk Sting hian nikum chhung khan $mtd 210 a lalut a, Grammy Award vawi 17 lai dawng tawh hi a la ropui vet vet hle. American actor Tyler Perry chu pathumna niin, $mtd 175 a lalut ve bawk. A sum lakluhna lian zual chu film streaming leh BET TV show te a ni. 

Trey Parker & Matt Stone te chuan $mtd 160 an lalut a, James L. Brooks & Matt Groening ten $mtd 105 lalutin an dawt. American actor Brad Pitt chuan $mtd 100 lalutin parukna a hauh a, ani hian lemchan bakah nikum khan a Plan B production company chu $mtd 113 laiin a hralh bawk a ni. 

Rolling Stones chuan $mtd 98  an lalut a, Canadian filmmaker lar James Cameron pawhin $mtd 95 zet a huilut ve bawk. Taylor Swift chu $mtd 92 lalutin pakuana a ni a, Bad Bunny chuan hnu kharin $mtd 88 a laut ve bawk.