Mizo rawlthar badminton star pahnih, C.Lalramsanga leh H.Lalthazuala te chu October thlaa China-a khelh tur, YONEX BWF World Junior Championships 2024-a India atanga tel thei tur zawnnaah an inlan dawn.

Durtlang rawlthar Sanga leh Chanmari West rawlthar, Thazuala te hi India aiawha China-a khel phak tur zawnna pakhat, Yonex-Sunrise All India Junior Ranking Badminton Tournament 2024 khelh zawh takah India aiawhtu tur thlan turte inelnaa inlan phak khawpin an che tha a ni.

Bhubaneswar, Odisha-a Ningani kal ta atanga khelh tan, Nilainia zawh takah Sanga hi Under-19 Boy’s Doubles-ah inlanin a kawppui nen bronze medal an vaw chhuak a. Doubles bikah hian semifinal lut chinte chauh India tana inlan tur zawnnaa kal phak an ni a, an tel ve thei dawn a ni.

Mission Veng Badminton Club-a khel mek, Sanga hi Badminton Association of India (BAI)-in a din, National Centre of Excellence, Guwahati-a inzira awm mek a ni a, Bhubaneswar tournament-ah hian Bhavya Chhabra, Delhi nen an tangdun a ni.

All India Junior Ranking Badminton Tournament 2024-ah hian Sanga hi Mixed Doubles-ah Lalrempuii, Ralte Villa Badminton Club nen tangdunin round of 16 an inhlangkai bawk.

Chanmari Shuttlers Club-a khel lai, Thazuala pawh hi chu Under-19 Boy’s Singles-ah inlanin Seeded No. 9 niin round of 64 atanga khel tanin quarter final a invaw kai a. Maltanah a thiam pariat chinte chu India aiawh tura thlan turte inelnaa inlan phak an nih avangin ani pawh a tel ve thei dawn a ni.

BWF World Junior Championships hi September 30 atanga October 13, 2024 chhungin Nanchang, China-a khelh tur a ni a. India aiawha tel phak tur zawnna hnuhnung, final selection trials hi Inrinni atang hian New Delhi-ah kalpui a ni dawn a, Thawhlehni thleng awh a ni dawn a ni.

Bhubaneswar-ah Mizo naupangte an che chhe lo

Odisha khawpui, Bhubaneswar-a All India Junior Ranking Badminton Tournament 2024-ah hian Mizo naupang inlan dangte pawh an che chhe lo va, Sanga anga medal hlawh chhuak awm lo mah se an kum leh thlen chin thlirin hmabak êng tak an nei tih a lang.

Under-17 player ni mek, Sainunmawia Sailo, Sihphir Badminton Club chu Mixed Doubles-ah Ishita Negi nena tangdunin an inlan a. Qualifying round atanga bul tanin, pre-quarter final an invaw thleng a. Ramhlun Venglai rawlthar hi kum 16 chauh a la ni a, hmabak a nei êng hle.

Lalrinkimi, Mission Veng Badminton Academy pawh qualification round atanga bul tanin Under-19 Girl’s Singles-ah a inlan a, a vawi khat nan main draw a invaw kai thei bawk.

All India Junior Ranking Badminton Tournament 2024-ah hian India ram hmun hrang hrang atangin player 797 an tel a. Mizoram Badminton Association (MBA) chuan ram pum huap intihsiakna liana Mizo rawlthar duhawm tak, Sanga'n lawmman pathumna a la phak hi ropui a tiin a chhuang tak zet tih a sawi a. Tournament-a inlan Mizo thalai zawng zawngte-ah pawh hmasawnna hmuh tur a awm zel hi ropui a ti tak zet tih a sawi a, an kal zelna turah duhsakna a hlan bawk.

MBA hian Mizo naupang leh thalaiten hlawhtlinna an chan mek zel theih chhan chu TATA Trusts (NEIDA) nena an thawhho rah a ni tih an sawi a. Anni zarah hmun hrang hrangah grassroot centre dinin, Regional Competitive Training Centre leh Pullela Gopichand Intensive Training Centre (PGITC) thlengin duansak an ni a, chuta tanga hlawhtlinna hmu chho zel chu an ni tih sawiin an chungah lawmthu an sawi.