October 4, 2023; SYMA Champhai hnuaia Legal & Vigilance Committee buatsaihin tunhnai khan Champhai Zotlangah raltlante dan leh hrai zirtir an ni.

Zotlang YMA Hall-a hun hman hi F Lalrinmuana SYMA Champhai President chuan a telpui a, raltlante chu Myanmar leh Manipur-a Zofate'n harsatna an tawh chungchangah YMA Zofate tan a ding reng dawn tih tih sawiin, raltlante chu an awmna hmun theuhah khawtlang inkaihhruaina leh ram dan leh hraite tha taka zawma khua leh tui tha tak ni turin a chah a, harsatna an tawhna hmunah Mizoram chhunga zofate'n an tlansan ngai dawn lo tih hre reng turin a chah bawk.

T Lalthafamkima, Advocate chuan India khua leh tui ni lo tan India ramah in hmun lo ram neih a theih loh dan te, dan leh hrai zawm tur hrang hrangte bakah danin a phal loh thil tilui man te India danin a hrem theih dan hrang hrangte a sawi bawk.

ASI C Hmingthantluanga'n Champhai district chu ruihhlo kalkawng lian tak a nih thu leh khawchhak lama ruihhloa sumdawng thinte'n Mizorama raltlan awmte hman tangkai an tum thin thu sawiin raltlante chu ruihhhlo tawlh ruk chungchanga inhnamhnawih lo turin a hrilh a, ruihhloin chhungkua leh khawtlang a nghawng dante sawiin ruihhlo ti lo tur leh a tawlh ruk kawnga inhnamhnawih lo tura chhungkuaa inzirtir a pawimawh thu a sawi bawk.

Champhai Zotlangah hian raltlan chhungkaw 31 awm mekin, mipa 81 leh hmeichhia 88 an vaiin raltlan mi 169 an awm mek a ni.