Aizawl: Central YMA chuan Sub.Hqrs., Group leh Branch te hnenah lehkha thawnin kumin YMA Day (June ni 15) hian mahni huam chhung theuhah YMA flag a tam thei ang ber tar nise an ti.

Central YMA chuan June 15, 2020 (YMA Day vawi 85-na) chu hripui leng vangin kum danga hman angin a hman theih dawn loh niin an sawi a. YMA day lo thleng turah hian heng te hi hrethar leh turin Sub. Hqrs/Group leh Branch YMA te an ngen.

1. YMA Day-ah hian mahni huam chhung theuhah YMA Flag a tam thei ang ber tar nise.
2. YMA DAY 2020 thupui atan ‘Zirna Uar’ hman ni se.
3. YMA hi tanpui ngaite tanpui thintu a nih angin, veng/khaw chhunga mi harsa leh chhumchhiate dapchhuak a, a theih ang anga chhawmdawla tanpui nise.
4. Faina leh thianghlimna hi YMA ten kalphung ngheta kan lo neih tlat tawh angin, he ni denchhen hian a theih ang anga vengchhung thenfai hna thawh nise.
5. Sub. Hqrs/Group leh Branch YMA ten a remchan dan a zirin Hospital/Home/Centre-ah te tanpuina thilpek hlan nise. Tin, YMA In, Library, Lungphun, Signboard leh thil dangte tuaithar leh nise.
6. A theih ang angin thangtharte-ah tlawmngaihna leh Mizo thuam inbel uar inzirtir thar leh nan hman nise.