ZALEN June 15, 2025: Central YMA President Lalhmachhuana chuan, “Young Mizo Association (YMA) hi NGO a ni mai lo a, hnam innghahna lungphum, Mizote min phuar khawmtu leh a tul anga ram leh hnam tana ke pen thin a ni,” a ti.

Vawiin YMA Day vawi 90-na puala thuchah a siamah CYMA president chuan YMA chuan a din tirh, kum 1935 atanga vawiin thlengin Zofate tan thil tha tam tak a ti tawh tih a sawi a. Kumin YMA Day pualin home, damdawi in leh Mizoram pawna Mizo welfare tan an luang chhuak tih a sawi.

YMA chungchang sawiin, “YMA hi thleibik nei lo pawl, a tê ber atanga a lian ber thlenga min hrut-rualtu pawl a ni a. Rikrum leh chhiat tawh thilah YMA hi auh hmasak ber a ni thin a. Sual do tur pawhin YMA-in ke a pen thin a, mipuite thlamuantu pawl a ni,” a ti.

YMA chuan ramngaw leh nungcha humhalh kawngah te, faina leh ruihhlo do kawnga a hmalakna avangin hriat a hlawh tawh hle tih sawiin lawmawm a tih thu a sawi a. YMA Day denchhen hian thisen pek, ei leh bara luan chhuah leh mi dangte tana thil tha tihna nia hmang turin mipuite a chah bawk.