Aizawl: Central YMA hnuaia Kumpuan Sub Committee te chuan nimin zing khan an chairman Lalhmachhuana, Central YMA vice president ni bawk hovin gas tih chingpen bur engemaw zat an man a. Legal Metrology kutah an hlan nghal.

Thudawn danin Central YMA Kumpuan Sub Committee te hian report an dawn bawhzuiin Khamrang leh a chhehvelah gas tihchingpen a awm leh awm loh an dap a, zankhua tlaivara an dap hnuin nimin zing dar 3:20 vel khan Truck (Ashok Leyland) AS-9322, Mirjan Ali Laskar s/o Soyab Ali Laskar, Sonabarighat, Assam  khalh chu manin driver inpuanna atangin gas a tihchingpen ngei thu a sawi a. Motor leh a khalhtute hi Central YMA office ah lak an ni.

Central YMA hian Legal Metrology hotute bepawp nghalin an ni hian gas tih chingpen a nih leh nih loh an enfiah nghal a. Bur 27 an endik zingah bur 21 chu khawih a ni tih an hmu a, bur 6 chu khawih a ni lo thung. Thuneitute chuan a dang pawh hi la enfiah zel an tum tih an sawi.

Truck hian gas bur 342 a phur a, gas hi Suakchhunga Gas Agency te ta tur nia thudawn a ni.