Aizawl; Covid 19 laka him nana hmalaknaah Mizoram sawrkarin ramri ah gate 48 enkawl a nei mek a, heng zinga 35 hi international gate a niin a dang 13 hi inter state a ni. International gate zingah Zokhawthar leh Kawrpuichhuah chiah hawn a ni a, inter state zingah Vairengte, Bairabi, Kanhmun leh Khawkawn te hawn a niin a dang hi khar vek a ni. Mizoram hian international ramri km 720 a nei a, heng zinga km 402 hi Myanmar ramri a niin a dang km 318 hi Bangladesh ramri a ni. Heng hmun atanga khualzin lo lut te hi khawsik an neih leh neih loh lo endik an ni thin.

Mizoram Police te an indaihloh avangin Indo-Myanmar ramri a khaw engemaw zat chu khawtlang in inkalpawhna gate hi kharin an veng zui a. Myanmar ramri a duty YMA hruaitu pakhat chuan, "Corona virus lo chhuahna China ram leh kan thenawm Myanmar te hi thui tak ramri nei an ni a, insumdawn tawnna pawh an kalpui tha a. Hetih lai meka Myanmar ah Covid-19 vei an awmlo tlat mai hi a ngaih that thlak loh a. Chuvangin kan unaute mah nise Myanmar atang hian he hri hlauhawm tak hi a lo luh kan hlauh em avangin ramri hi uluk takin chhun zan zawmin kan veng a. A inchhawkin kan veng thin a, eng chen nge kan kalpui theih ang tih a hriat loh a ni," tiin Zalen palai a hrilh.