Aizawl: October 15,2020 a YMA rorel inkhawm neih tum chu hri leng avangin thulh a ni.

Zirtawpni kaltaa YMA thuneitu sang CEC thukhawm chuan October ni 15,2020 a YMA rorel inkhawm Mizoram University Auditorium, Tanhril a neih tura a lo rel tawh chu hripui leng mek lak a him zawk nan thulh nise an ti a. Hruaitu hlun chawimawina, Kumpuan, Ramngaw & Nungcha humhalh leh Tuihna humhalh tha chawimawinate chu nakum 2021 General Conference ah hlan mai ni se an ti a. Kum 2020-2021 CYMA Budget chu CEC in a tul anga ruahmanna an siam tura dah a ni.

CEC meeting chuan Life member dilna an dawn chu rem an ti a. Sub-comt pahnih atanga sanction demand Rs. 6,16,800 chu an pawm a. DM&R, Mizoram atanga Bolero Camper an dawn chu chhiatna lam hnathawh nan tangkai zawka hman a nih theih nan chei that rem an ti bawk.

Kum khat dana neih thin YMA rorel Inkhawm hi tum hnih neih a lo ni tawh a, October 22, 2016 khan R. Dengthuama Auditorium-ah neih a lo ni tawh a. October 19, 2018 khan Vanapa Hall-ah a tum hnihna atan neih a lo ni tawh bawk.