India sawrkar laipuiin nasa taka Yoga a tih lar leh sikulah naupangte zirlaia loh theih loha telh tumna (compulsory Yoga education) a lo awm takah hian Yoga chungchang hian mimir ngaihtuahna leh chanchinbute pawh a luah ngun ta malh malh hle a. Mi thenkhatin a sakhuana leh a venthawn ngaihna laite an hmuh len viau laiin a then erawh chuan chung zawng zawng en kanin a tangkainate an uarin an sawi mawi hle a. Hetianga mi an inhnial luih luih tawh hi chuan ‘za a zain a him lo’ tih chu mi ang pangai tan chuan hriat thiam ve mai tur ni awm tak a ni a. Tun hi ngaihtuahna sen theih hun lai leh tul hun lai tak a ni a. Yoga chungchang ziaka indona (paper war) nei ila, ngaithlatu (chhiartu) ten pawm tur dik zawk pawh an hmu mial thei. Pu Modi-kaihhruai, BJP sawrkarin Yoga a buaipuia tihlar a tum viau chhan hi mahni phak tawk tawkin ka lo ngaihtuah nasa ve hle a. Eng vangin nge naupang zirlai leh zirtirtu training-naah loh theih loha hman tur a tih tlat mai le? An sawi ang hian mihring hriselna atan a lo that tak tak vangin kan hrisel hi min lo duhsak viau em ni? Chu ti tak maia kan hriselna tur min han duhsak ta mai leh kan hrisel loh hlaua sikul naupang zawng zawngte’n loh theih loha an zir ngei ngei tura ruahmanna an han siam ta a nih chuan vai ho hian an rilru tak takin min lo hmangaih tihna a ni ang a. Vai ho hi an rilru a lo thain an lo fel viau a ni bawk ang a. Kan hnam sipaite’n India atanga min chhuahpui tuma an lo rammu te kha tih loh tawp tur an lo ti emaw ni le… te ka ti ta rum rum a. A awihawm chiah lo a ni. Hetianga ka ngaihtuah lai hian tualchhung chanchinbuah fakna a lo chhuak ta reng a. Yoga thehdarhtu pawl, tun hnai lawka din SPANY (Society for the Propagation of Ayurveda, Naturopathy and Yoga) chuan AYUSH Wellness Center, Chanmari, Aizawlah an hawng thar a, he centre-ah hian natna chi hrang hrang, pile tha lo, asthma, sinusitis, zunthlum, etc. veite leh a duh apiang ten hriselna tha an neih theih nan Yoga teacher thiam tak kaihhruaina hnuaiah a free-in Yoga a practice theih tih an rawn zuar (advertise) a. He society hian Mizote damna tur min va duhsak em ve maw le, han tih mai pawh awl tak a ni. Mahse sawrkar meuh pawhin a thlawna mipui enkawlna (free clinic) ni khat emaw lek neih pawh a harsata hetiang khawpa chhang khata free clinic kan hmuh laia a duh apiangin an damna tura a thlawna Yoga an practice theih nana an han inhawng mai hi, ngaihtuah chian chuan ngaihtuah a ti thui hle a ni. Kum 2007 khan Hindu sakhaw lehkhabu zinga pawimawh ber pawl, Srimad Bhagavad Gita chu mi tu ten emaw Mizo tawngin an letling a, Heritage Foundation, Guwahati-in an published a. Hetiang sakhaw dang lehkhabu kan tawng ngeia chhiar tur awm hi a tha hle a, kei phei chuan sakhaw hrang hrang lehkhabu, ka chhiar theiha ziak zawng zawng chu ka chhiar vek a. Dr Lalchhuanawma ziak, Mihring leh A Sakhua, phek 722 a chhah pawh ka chhiar chhuak vek. Muslim lehkhabu thianghlim, Koran pawh ka chhiar nasa a. Chung sakhaw dang lehkhabu ka chhiar atang chuan Bible hlutna ka hriat belh a ni. Isua hriatna ropui bik pawk kan neih phah bawk a ni. Amaherawhchu Bhagavad Gita kha a kawm khawng, phek 208 a chhah Rs. 20 man chauh a ni erawh a mak hle a. Mi panga (5)-in Mizo tawnga Bhagavad Gita lehlin a nih thua lawmthu an sawina leh khuanu malsawmna an duhsakna thuchah an ziak a. Chungte leh letlingtu thuhmnahruai atangin Mizo zingah Hindu sakhua leh culture-ngaihsangtu an awm teuh tih a hriat a. Christianity aiin an pawm zawk pawh a ni mai thei e. Chu aia pawimawh zawk chu lehkhabu, Rs. 200 man aia hniam lo tur Rs 20 leka an zuar thei kha a pawimawh lai tak a ni. Khawi atanga emawa tanpuina hmuin Hindu missionary hna an thawk em ni le? Chutiang bawkin Yoga hmanga hetia a thlawna damna min han hlui ringawt tute hi tunge maw an nih le? Damlo te damna tura center hawng a, Yoga teacher thiam tak ruai a, natna nei a duh apiangte a thlawna Yoga practice tir mup mup chu a hautak hle ang tih hriat sa a ni a. Yoga an practice-na hmun atan chuan hmun zau tawk tak chu a ngai ngei ang a, Chanmari venga an Centre luahna man ringawt pawh a thla bi paw’n a tlawm zawk zawk lo ang a (Aizawla inluah man, a bikin khawpui lun laiah phei chuan a san zia chu tlang hriat a ni a). Tu nge a luah man tum? SPANY mi leh sa ten an thawh khawm em ni? Yoga zirtirtu thiam tak chu khawia mi nge? A thlawna zirtirtu tura Yoga teacher an rawih chuan hlawh phut loin Mizote kan lo hrisel zawk theih nan a rawn inpe tawp nge, a hlawh hi hmun dang atangin a hmu? Engtin nge an centre hi an enkawl (manage)? Khawi lam atangin nge Centre enkawlna tur hi an hmuh? Mizoram sum harsatzia chu namen a ni lo a. Kan Healthcare chhiatzia lah chu namen lo bawk a ni. Mipui (sawrkar) leiba lah namen loa tam! Mizo mipui leiba hi mipakhat zelin Rs. 50,000 (cheng sing nga) tling thelh kan ba theuh a. Hetiang zat leiba hi kei telin engtik khawtik maha rul thei lo tur kan tam ang chu aw! Hetiang hi kan dinhmun a nih mek laia a duh apiangte, Yoga practice-tir mup mup thei khawpa mi inpe an awm hi thil mak a tlingin ka hria. Han ngaihtuah thuak chuan an inpekna thuk zia hi sawiin a siak lo a. Ngaihtuah chet chet erawh chuan khawi laiah emaw tangka khur, belte phai thei lo anga thal tur an hmuh loh chuan hetiang thil hautak hi tu tan mah a tih theih loh a, tute emaw chuan an chhawmdawl ngei ang tih a rin theih chiang a ni. Missionary ang tak taka an inpe a nih loh chuan tunge an nih tih pawh hriat lohte tana hlawh nei lo hul huala han thawh chu, a ropui lutuk a a awih awm loh zawk a ni. Hetiang tak maia Mizo mipu ten Yoga kan practice na tura hmalakna a awm ta mai hi, hemi piah lam thil, puanhnuai thil a awm em tih ngaihtuah loh theih a ni lo. Mizote damna leh hriselna hi an thupui ber a ni takzet em? Chutiang taka min duhsak tur leh kan tana insengso tur chuan keini helai Northeast tribal kephah hlaite hi an tan eng nge kan nih? A nih loh leh kan damna hi an tum ber ni lo se eng nge an tum ni ta ang? He zawhna han zawh thlen phei hi chuan thin a phu a ni. Yoga sawi mawitu ten Hindu sakhua leh hnam a lo ropuizia leh Yogi leh Guru te an lo ril leh ropuizia an sawi nasatzia ka thlir hian, Yoga hian Mizo culture hi a sawinghing mai ang tih ka hlau a ni. Hetiang taka Hindu sakhua leh an culture te an lo ngaihsan tak nachhan hi Yoga an practice thin vang a ni tih hi anmahni ngei pawhin an hnial ka ring lem lo, khawvel hmun dang, USA ah te pawh Hinduism a larna chhan ber pakhata an puh chu Yoga hi a ni. Mizo tihdan lo zawng ngaihsan loh tur kan tihna a ni lo a; mahse, mi dang leh an tihdan ngaihsan hian anmahni entawna mahni nihna (identity) hial hloh/kalsanna a thlen fo avang leh, chumi avanga hnam inchimral (cultural assimilation) te pawh a thlen tawh thin fimkhur thu kan sawi a ni (Hetiang dinhmuna ding tawh Meiteiho chanchin atang pawhin kan hmu chiang a ni).