Aizawl October 9, 2024 : LBS Suzuki Youth Icon top 10 intihsiakna chu zawh fel a ni ta a, zaninah intihsiakna neih tan hma in a tla tur puan a ni dawn a, mi 9 te an intihsiak chhunzawm ang.

Top 10 intihsiak hi zan hnih neih a ni a, October ni 7 zanah Contestant te chu an hla duh zawng sa in an intihsiak a, nizan khan CFL Hmingthanga hla hmangin intihsiak an chhunzawm leh a. Zan hnih intihsiakna atangin endikna kalpui a ni a, zaninah mi pakhat thlah liam a ni anga, intihsiak tan hma in a tla tur leh intihsiak chhunzawm turte puan a ni ang.

Top 10 intihsiakna zan khatna zawkah hian Contestant te an zai tha lo tlangpui a, Social Media lamah pawh an zai that loh thu leh Contestant thenkhat hla thlan fuh tawk lo thu hi titi a tling a. A zan hnihnaah erawh a zai tha tlang a, zaia inelte'n hma an sawn chho telh telh niin a lang a, intihsiak boruak pawh a hmuhnawm sawt hle.

Youth Icon 2024 top 10 intihsiak hi Host hriat hlawh Mafeli Hlondo in zei takin a host a, a che vel hi show ti hmuhnawm tu pakhat a tling a. Judge te pawh an comment pek a ngaihnawm a, a zanhnihna CFL-a night ah hian Judge zinga mi Andrew Laltlankima'n Pu CFL-a chanchin chungchangah constestant leh mipui chhan theih turin Quiz a siam a, hei hian boruak a ti nuam zual hle.

Intihsiak hi LPS-1 ah Live in pek chhuah a nih bakah Show neihna hmun LPS Arena, Falkland-ah chhim theih a ni a. Youth Icon hian ngaih hlut a hlawh hle a, show neihna hmunah chhimtu mipui an thahnem thei hle a ni.

Intihsiak hi tun kar chhung zan tin neih chhunzawm a ni dawn a, zan tin intihsiak tan hma in a tla tur puan thin a ni dawn a, Inrinni zanah top 6 intihsiak neih a ni anga, Pathianni erawh chawlh a ni anga, kar thar thawhtanni ah chhunzawmin hemi zan hian top 5 intihsiak neih a ni anga, ruahman lawk dan chuan October ni 19 ah Grand Finale neih a ni ang.