ZALEN, Feb. 28, 2025: Kristian Thalai Pawlin Falkland Veng, Aizawla Youth Recreation Centre (YRC)-a convention centre sak thar chu Zirtawpni khan Synod Moderator Rev. R.C Lalnghakliana’n a hawng.

YRC Sub Committee Secretary Nicholas Lalbiakzuala’n report a pek danin convention centre hi kum 2019 atang khan sak tan a ni a, a sak nan hian Rs. 8,44,28,280 sen ral a ni tawh.

Convention centre building hi 3,509 sq. metre (35,330 sq. ft)-a lian a ni a, a chhungah hian mi 900 len theihna hall, Synod Choir Cabin, mipa 60 leh hmeichhia 40 riah theihna dormitory, dining hall, choka, restaurant, committee room leh chowkidar quarters te a awm.

YRC Convention Centre hawnna inkhawm hi Central KTP Leader Rev. H. Lalawmpuia’n a kaihruai a, Synod Executive Secretary Rev Dr Rosiamliana Tochhawng-in thu a sawi bawk.