Aizawl May 22, 2023 :  Vawiin Mizo Hnam Runah chhung Inkhawm hun hnihnaah thu sawitu MNYF Vice President Zodinpuia chuan, Mizoram chu Pathian-in Zofate Jerusalem ni tura a din a ni a. Zohnahthlak rorelna pakhat hnuaia a awm leh theihnan hnama min dintu   kawng min ruahmansak mêk a. Zofate’n zalenna famkim a neih hma  chuan MNF chu Mizo mipuite hruai tura Pathian pek niin a sawi.

Zodinpuia chuan, "India ramah hian party hrang hrang kan awmkhawm a, hmalak dan pawh a in ang lo hlawm hle a, a tha ber tur MNF chuan mipui tan a ngaihtuah a, Mizoram political party zingah MNF aia hruaitu nei tha an awm lo. Congress, ZPM leh BJP hotu lu te chu hun rei tak MNF-a lo awm tawh, nihna leh chanvo thlâkhlelh avanga political party hrang hranga awm kual tawhte an ni a, an party awmna ah theuh MNF hmalak tawh chu hmuh thelh luiin a chhe ber ang mai in kan hotulu te an mawhpuha, hei hi mipui rilru a nilo zawng a hruaikawi theihna a ni," tiin, chhe ber anga maia in mawhpuh ching tam tawh lo se a duhthu a sawi.

MNYF Vice President chuan, "Mizoramah hian party thenkhatin inchirh thehnan kohhran/khawtlangah inlungrualna tichhe thei zawng a thusawi an awm zeuh zeuh thin chu a pawi a tih thu sawiin, hei hian thalai-ah hnam chungchang thlenga nghawng theih thil a nih avangin thudik ziktluak lo sawi tawh lo turin ka duh a ni," a ti bawl.

ZORO  General Secretary L. Ramdinliana Renthlei, EX MZP President pawhin thu sawiin, ZORO hmalak tawhna leh ZORO kalphung bakah ZORO inkhawmpui buatsaih leh a ni dawn a, mipuite tel vek turin a sawm. "ZORO hi political party a ni lova, Zofa zawng zawng chu ZORO ah hian an leng vek a ni. Politics hi chi hrang hrangin a thliar theih ang a, ZORO chu hnam politics keng tute kan ni. Khawvel a awm Zofate rorelna pakhat nei a kan awm theih nana hmalatu a ni a, Zofate kan insuihkhawm a, lungrual taka kan awm theihnan theihtawp chhuah a hma a la thin a ni," a ti.

Lere-a chuan, "Manipur buainaah MNF in che tha hle a. MNF party hi Mizo Nationalism kengtu chu in lo ni," tiin, "Politics tih hi a awmzia takah chuan mimal emaw pawl emaw khua leh tui thatna tura inkaihhruaina, mitinin dik taka an chanvo theuh an chan theihna tura rorelna, dan leh thu pek, hnam leh hnam chi leh chi inkara inunauna tha thlen tura thawhna hmun te, hnam ziarang humhalh te, ramri khamfel leh mipui vantlang thatna tura rorelna tih te hi a huam vek a ni," a ti bawk.