June 28; 2022; Tukin dar 1 bawr vel khan, Burma kuhva ro bag 285 phur, 1616 Tata truck chu Zamuang khua ah man niin, vawiin chawhma lam khan kuhva rah zawng zawngte chu mi thenkhatten motor atanga hlang thlain an hal nia thudawn a ni. Hemi chungchangah hian kuhva neitu lam chuan police ah FIR an thehlut nia hriat niin, vawiin chawhnu dar 3 vel khan Zawlnuam police te chu a hmunah kalin, thil awmdan an enfiah a, Civil SDO pawhin a hmun ah thil awmdan a enfiah tawh nia thudawn a ni. 

ZALEN thudawn danin, mi thenkhatte chu report an dawn angin nizan khan duty in an thawk chhuak a, zing lam dar 1 vel ah, Burma kuhva phur, 1616 Tata truck, Ramenga, Thangsarai, Tripura lam mi khalh chu Zero point, Zamuang ah an lo man a ni.

Kuhva an man hnu hian engemaw venthawn thil thuah tlaivarpui a ni a, committee te nei chhunzawmin, an hmalak dan tur te an rel chhunzawm a, nizan lamah boruak duhawm lo dang thleng zui a awm lo.

Hetihlai hian vawiin chawhma lam khan mi thenkhatte chuan kuhva bag te chu truck atanga hlang thlain an hal a, a phurhna motor tihchhiat a ni lo a, a phurtu driver pawhin tu kut mah a tuar lo nia thudawn a ni. Burma kuhva bag 285 man chungchangah hian kuhva lo man tu lam chuan police ah FIR thehluh an tum a, hetihlai hian kuhva neitu lam pawhin kuhva hal a nih chungchangah FIR a thehlut nia an hriat niin, khawi police station ah nge FIR a thehluh tih erawh chiang taka hriat theih a la ni lo.

ZALEN thudawnna chuan, a hmalam pawhin Burma kuhva vawi 3 an lo man tawh a, chungte chu chhuah an nih leh thin avangin, mipui thahnemngai zualte chu hetiang hian an lo che ta mai nia an hriat thu ZALEN an hrilh.

Kuhva phurtu driver sawi danin, kuhva rahte hi Tripura a phurh luh tur a ni a, chuta tang chuan motor te zawkin in Assam a phurh leh tur a ni.

Vawiin tlai dar 3 vel khan Zawlnuam police te chu a hmunah kalin, mi hrang hrang thu an zawtfiah nia thudawn a ni a, he thil thleng chungchangah hian police lamin thu zawhfiah atana man (arrest) an neih leh neih loh hriat mai theih a la ni lo.