Aizawl : Tripura atanga awlsam zawka chak lak a nih theihna atana Mizoram sawrkarin Mizo Hnam Project tia a hming a vuah, Zamuang to Bairabi Road leh Kanhmun Lei chak tawk lo siam hna thawh chu nimin khan mipui tan hman turin peih fel a ni a, Teirei Lei khawih turin inpuahchahna an kalpui leh mek.

Mizoram Public Works Department Western Circle EE T. Lalthanhauva hnen atanga ZALEN-in thu a dawn danin nimin khan Langkaih luia Kanhmun Lei hi dawh zawh a ni a, he lei hi Metric ton 20 zo tur niin a thawm that hna hi kar thum chuang zet thawh a nih thu a sawi. Bairabi to Zamuang Road (BZ Road) chu tunah hian hman theiha peih fel a nih tawh thu a sawi a, he kawng hi blacktop a nih loh thu sawiin, kawng chhe lai te hnawh vek tawh a ni a, thal lai chuan chhawr rih theih a nih tur thu a sawi bawk.

Kanhmun lei metric ton 20 dawl zoa siam a nih avangin Teirei lei metric ton 15 dawl mek chu 20 dawl zo tura siam leh tur a nih thu Er. T. Lalthanhauva chuan ZALEN hrilhin chak lakkhawm nen kar 5 chhungin zawh an tum thu a sawi.