Aizawl : Covid-19 hri leng avanga kum hnih dawn zan lam curfew a puan hnuah lirthei chetsualna avanga thi an tlem hle tih police lam atanga thudawn-na chuan ZALEN a hrilh a, kumin bikah phei chuan curfew laia lirthei chetsualna avanga thi hi pahnih chiah an awm. Lirthei tlan dan pawh thlak leh tum a ni.

Curfew hun hi hri len tirh leh tun hnaiah hi chuan a hun pawh a danglam hret a, tlai dar ruk atanga zing dar li thleng curfew a nih leh zan dar riat atanga zing dar li thleng curfew hun hi a inthlak, kum kalta 2020 khan Aizawl Municipal Corporation (AMC) huam chhungah hian lirthei vanga chetsualna vanga thi hi sawmpakhat an awm a, Aizawl district huam chhung hmun dangah chetsualna avanga thi hi pali an awm thung. 2020 chhung hian accident vanga thihna hi tum 21 a thleng a, tum 16 hi AMC area-a thleng a ni.

Kumin, 2021-ah hian zan lama chetsualna hi a tlem mai bakah thi pawh an tlem a, Zirtawpni thleng khan mi pahnih chiah an la thi. Kumin chunga accident vanga thi hrim hrim erawh 12 an tling tawh a, AMC huam chhung bikah thi pasarih an awm. Superintendent of Police, Traffic Sr. SP R.D. Chawngthu hnen atanga thudawn danin zan lama lirthei chetsualna avanga thi hi kum dangah te kha chuan 40 chuang te an awm thin thu ZALEN a hrilh.

Zan curfew chhunzawm tha a tih leh tih loh ZALEN zawhna a chhannaah Traffic SP chuan, “A tulna hi a awm em em tawh lohna lai a awm rualin, accident leh crime hrim hrimah hi chuan a thatna lai chu a tam thei khawp mai. Chutihrualin kan police te erawh an hah phah deuh a ni,” a ti.

Traffic Police SP chuan lirthei intlanchhawk dan pawh thlak danglam leh an tum mek niin a sawi a, Pandemic hmaa intlakchhawn dan thin, nikhata a tawp lam number pahnih chawlh (1&2, 2&3... Inrinni, Sunday leh Holiday vai tlan) tir ang khan kal leh a tul tawh niin a sawi. "Sikul khar a la nih avang leh hri avanga hian mipui hi kan chhuak tak tak chuang lo a, kan buai phah em em lo turah kan ngai. Mi tam tak tan odd leh even hi buaina a ni lo a, chuti chungin nitin chhuah mamawh tak tak an awm avangin tlan dan thlak hi a tul tawh," a ti. Hotu lamah pawh hemi chungchangah hi an thlen tawh thu a sawi bawk.