Aizawl: Health & Family Welfare Minister Dr. R.Lalthangliana chuan Covid-19 chungchangah Mizoram mipuite chu thu awih tak leh fimkhur taka tangruala thuneitute thu zawm turin mipuite a sawmin, “Tun hun hi fimkhur ngaih hun lai ber a ni a, zan hnih khat thil thuah fimkhur loh avanga chhiatna vawrtawp thleng thei reng kan ni,” a ti bawk.

Nimina thuchhuah a siamah Health Minister chuan fimkhur a ngai tih sawiin, “Kan ram mi leh sate ngei state hrang hrangah hun rei tak tangkhangin an mangang mek a. An ei leh in leh awmna tur thlengin sawrkarin ngaihtuahin tan a la mek a. A tir lama lockdown kan kalpui chhung zawng leh ram pawn atanga lo lut an awm loh lai kha chuan kan him tlang vek a. Tunah erawh state dang atanga an lo luhna gate-pui hawnsakin tam tak an rawn haw takah chuan, hri kai tamna hmun thui tak paltlanga rawn haw mekte an nih avang hian, kawng lakah kai palh thil pawh awm thei a ni a. Chuvangin, kawng tinrengah a hma aia nasa taka kan fimkhur tlan zual fe a ngai a, sawrkarin dan leh hrai zawm tur a siamte uluk taka kan zawm tlan vek loh chuan zan hnih khat thilah fimkhur loh avanga chhiatna vawrtawp thleng thei reng kan ni,” a ti.

Health Minister chuan a huhova quarantine-te leh loh theih loh avanga mahni in lama quarantine-te pawh khung hran an nih mek lai hian sawrkar thu chhuakte zawm hram hram turin a chah a. An duhthusam anga tha leh nuama kan enkawl vek theih loh pawhin, ‘Ram tana ka tih ve theih a ni,’ ti chunga lungdam taka pawm thiam turin a ngen a, an lo chhuah hunah pawh thil thleng palh thei a la awm a ni tih hre chunga thiantha leh chhungkhat lainate intlawhpawh kawngah fimkhur turin a ngen bawk.

A nawlpui tam zawk an lo luh fel hnu pawhin chawlhkar hnih dawn chhung chu fimkhur zual a la ngai dawn tih sawiin Health Minister Dr. R.Lalthangliana chuan, “Covid-19-in kan ram dinhmun a tihdanglam dan tur chin a la hriat loh a. Chuvangin, thuneitute hma lakna kan zawm zel a pawimawh a, chutianga kan awm phawt chuan Pathian pawhin mal min sawm ngei ang,” a ti.

Mizoram sawrkar leh Private Hospital-te pawhin Covid-19 damlo tam zawk enkawl chu an hmanraw neih hrang hrangte thlirin an la zuam lo tih sawiin, “ZMC-ah pawh ICU khum 7 kan la nei a ni mai a, damlo pakhat ringawt enkawl pawh a buaithlakin, doctor leh thawktu dangte enkawlna senso pawh a hautak hle a. Covid-19 damlo hi doctor zawng zawngte enkawl theih a nih loh avangin, a enkawltu bik an awm a ngai a, enkawl a buaithlakin a hautak hle a ni,” tiin Health Minister thuchah siamah hian tarlan a ni.