June 28, 2023: Vawiinah khan Aizawl Municipal Corporation Board of CouJuncillors’ (BoC) meeting chu Aizawl Mayor, Pu Lalrinenga Sailo kaihhruaiin neih a ni.

BoC meeting-ah hian Lalringliana, Executive Councillor (Cash & Accounts) in AMC Financial Statement 2022-2023 a pharh a, chipchiar leh uluk taka sawi ho a ni a. Corporator te putluh motion pawimawh tak takte pawh sawi ho a ni bawk.

Vawiina AMC BoC meeting chuan traffic jam tih ziaawmna tur leh mipui tana awlsam zawk turin Aizawla hmun remchang leh lûn bikah te zan lamah bawlhhlawh khawn ni tawh se tiin thutlukna a siam a, heng bakah hi chuan zing kara bawlhhlawh khawn kalpui mek hi a tul angin kalpui zel a la ni dawn a ni.

AMC chuan bawlhhlawh phur motor tinah helper dah ngei ngei turin a rel bawk a, dan zawm lo leh helper tel loa bawlhhlawh khawn khawm te chu na taka hrem ni se tiin BoC hian a rel a ni.

Aizawl khawpui kawtthlera Electric banbleh remchang danga TV cable, Internet cable leh hrui dang zam hnawk chinfelnan khuahkhirhna dan (regulation) siam turin thutlukna siam a ni bawk.

AMC chuan Aizawl khawpui chhunga mihring chenna hnaih lutuka vawk vulhte titawp tura chak taka hmalak a remti a. Mihring chenna atanga 100 feet aia hnaiah vawk vulh khap ni se, tuna vawk vulh mekte ngai changin January 15, 2024 atanga kenkawh tan ni se tiin thutlukna siam a ni.