ZALEN February 22, 2025 : Hmar Students' Association (HSA) chuan Chief Minister Lalduhoma leh a kaihhruai Zoram People's Movement (ZPM) sawrkarin Mizoram leh Manipur inkalpawhna Lei (Bailey Bridge) rang taka hma la a, a dawh zo chu Sawrkar chungah leh Chief Minister Lalduhoma chungah lawmthu an sawi.

HSA chuan, "He hmalakna pawimawh tak hian Mizoram pawn leh chhunga awm Mizo hnam te tana in inpekzawhna leh an sawrkarna hlawhtlin zia entirna pawimawh tak a ni. Chief Minister zahawm takin a thu sawina pakhata a lo sawi; ram hausa Africa ram khu an ram hausa hle mah se, political vision tha tak nei hruaitu an awm loh avanga hmasawn thei lo a awm an ni, a tih kha. Amah kan Chief Minister zahawm tak hi chuan kan ram hausakna te hrê chiangin hmasawnna tura pawimawh tak inkalpawhna Lei min hawnsakin, min ngaihpawimawhsak a, a tak ngeiin thu chauh ni loin, a thawka thawkin, hruaitu tha a nih zia a ti lang chiang hle a ni," an ti.

HSA chuan MLA leh Adviser to the Chief Minister Lalmuanpuia Punte inpekzawhna leh he Lei hlawhtlinna tura a hmâ lakna zawng zawng hi lawmawm an ti a. Lei hlawhtlinna tura rilru leh ngaihtuahna nasa taka sengtu leh engkima hma latu Vanlalhlana, Minister, PWD chungah pawh lawmthu an sawi.

"He lei hi inkalpawhna satliah ringawt a ni lova, taksa khawsakna leh politics-a inpumkhatna kawng a ni bakah thinlunga inpawhtawnna leh inlaichinna tha zawka min suihzawmsak lehtu pawimawh tak a ni. He lei hian Mizo hnam te inpumkhatna tha zawk leh thinlung taka inpawhna min siamsak zual ngei se tih hi kan duhthusam a ni," an ti.

Hmar zirlai te chuan, "He lei pawimawh tak mai hi a pawimawhna thûk zia hre rengin "Union Bridge" tia koh ni se kan duhthusam chu a ni. He hming kan rawn thlanna chhan chu keini Mizo fate kan inpumkhatna tura hranghlui ten theih tawp chhuahah min lo inpumkhattirna leh dawhkan min lo buatsaihsak "Mizo Union" tih hriat rengna tur leh inpumkhatna tura hma lo latu mihrâng te hriat rengna turin leh inpumkhatna tha leh zual min siamsaktu a nih theina turin he hming hi he lei hming atan hian vuah ni se, ti kan rawn chhâk chhuak ve a ni," an ti.