DOWNLOAD OUR APP

Read latest news on your phone
app-store
Zep then neia thilti-ah MNF in Congress an puh
Sep 14, 2022

Aizawl September 14, 2022: MNF Legislature Party Secretary leh MNF Adviser ni bawk L. Thangmawia chuan Congress party chu zep then neia mipui hnena thu dik kimchang lo puangah puhin, “That loh theih lohna bawm zuar tu te hian Mizo mipuite hnenah zep then tam tak neiin Mipui bumna bawm an rawn hung chhuak a ni,” a ti.

Vawiin chhun khan Aizawl Press Club-ah chanchinbumite kawmin L.Thangmawia chuan ni 10.9.2022 (Inrinni) a MPCC Media Department in chanchinbumite an kawmnah ni 1.4.2019 atanga ni 14.7.2022 inkar chhunga Mizoram Treasury 9 a Contractor-te Bill cheng nuai 100 chunglam chin chunglam an pekchhuah dan RTI hmanga an pekchhuah dan an sawina ah Treasury te bill pekchhuah 736 zingah bill 103 chauh thlang chhuakin, sawrkar chu contractor duhsak bik nei anga lantir an tum niin a sawi a.

L.Thangmawia chuan MPCC in Contractor zingah duhsak bik a nei nia an sawi chu sawifiahin, "Bill thehluh ni la laa pass nghal 105 an awm laiin MPCC te hian 10 vel chauh an sawichhuak a. An tarlan ve loh bill dang 90 chuang hi duhsak bik an ni ve lo em ni tih hi kan zawhna a ni," a ti a. "MPCC ten MNF sawrkar duhsak an tih contractor te Bill zawng zawng belhkhawm hi Rs 65,82,21,651 nia an sawi laiin sawi kim duh loh contractor dang te Bill belhkhawm Rs 33,31,69,63,074 a ni daih a. Bill chhuak zawng zawng atanga MPCC unaute rawn tarlan bik Contractor 6 te chan zat chu 1.93% chauh a ni a, an sawilan tel loh contractor dang te chan 98.06% hi eng vanga zep nge an nih tih hi kan zawhna a ni," a ti bawk.

MNF in contractor duhsak bik 6 a nei nia sawi chu a dik lo a ni tiin L.Thangmawia chuan, "Bill pass zingah hian Congress party a nihna sang tak nei te pawh an awm a, mahse hei hi sawi duh lovin MPCC te hian hre reng chungin mipui rilru hruaikawi an tum a ni," a ti bawk.

MNF Legislature Party Secretary hi Tuirial bialtu MLA K.Laldawngliana leh party hruaitu dang ten an tawiawm a ni.

Latest News & Chhiar Hlawh