Zoram Driver Union (ZDU) ten Road Safety week an hman denchhenin flag eng motor-ah kan tar phe a. Road safety hi mi tin himna atan a tul hle mai. ZDU mai ni lovin, kan zavaia kan thlawp a pawimawh hle. December thla kan chuang kai leh ta reng mai, Krismas bazar turin Zawlkhawpui kan pankhawm leh tan ta. Aizawl khawpui hmun pawimawh, mipui thahnem tak punkhawmna hmun, Aizawl ti-Aizawltute zingah Bazar luhna kawtchhuah Zion street hi bazarpui kawtchhuah pawimawh tak a ni a, bazarna hmun a ni nghal bawk. Kawng chho tak leh zim tak ni mah se ni tin lirthei leh mihring sang telten kan tlawh thin avangin a him em em tur a ni. Aw le, Zion Street lamah tun tum chu han leng lawk ang u hmiang. Hman zan chu hna lam thil avangin zan dar 8 velah Zion Street-ah ka awm a, ke sawm zet mai nei Truck bang sang chi khat tlata full load hi Zion Street kawng chhovah a tang tlat mai pek a, Driver-in gear lian chia han pawh chhoh a tum ngial pawhin a chhuak chho zo lo chu a ni ber a, tum loh thleng thleng a thui a tawlh thla leh thin. A vawi khatna a ni lo tih hriat takin zei takin handymen chuan a ke hnuang lamah Jam a kam zeuh zeuh a, darkar chanve dawn lai an beih hnu chuan a chhuak ve thei hram a. Kan khawpui kawng zinga mipui bukna hmun ber bazar kawng hi motor lian full load tan chuan a chho deuh hlek lo maw? Vawi duai lo motor lian a tang fo a, mi tam tak nunna hial chân theihna vanduaina a thlen teuh thin hle mai. City Bus passenger phur hnem deuh tan pawh helai hi a buaithlak thei viau mai bawk. Helai kawng chhuk chhova awm ni vuiliamtute hi mi hrang hrang kan ni si. Phur taka Bazar kal lam leh haw lam te, ngaih ngam taka kawng sira kal, thu, dawr nghak leh ualau taka kawngpui mawngtam poh khuma kawng kama thil leitu te, kalna dal lek leka PA set nena mitdel zai te, khawvel hi an thur emaw ti ni awm taka meng thur tiau chunga damdawi lei tur kal lam leh haw lam te, Zirtawp emaw tia sikul naupang haw lam inzui diah diahte leh rih hmel deuh si, mahse rit vak miah si lo, hmeithai in tia tia thawmhnaw leh eichawp phur luk luk mai te leh mi hrang hrang kan khawsa nileng a ni ber a. Engle khawle, heng mi hrang hrangte hian inanna pakhat kan neih chu kan inrin loh laiin motor lian a brake fail se kan insa seng hman lo vek ang. Tin, motor kal harsa khawpin kawngpuiah hian kan inhnawh chep a, foot path a te si, thil zuar an lo awm leh bawk thin nen, chu a chhapah, nepnawi leh tlereuh lei tuma kawng dala ding kan awm bawk nen, buaithlak tak a ni. Hei vang hian ding lam leh vei lama kalna foot path hi a hungna awmin siam ni se la, kan him tlang zawk ngei ang. Krismas lai khan helai kawngah hian pa pakhat chuan taxi driver a lo hau chiam mai a, kut a thlak nual nghe nghe a. A chhan kan han zawh chuan taxi driver khan speed a la laklawh si a, kawngpui an lo kân lak lawh bawk si nen, taxi khan na vak lovin a mawng tam vei lam pangah a tauh hi a lo ni a. A buaithlak ang reng khawp mai. Mipui lahin a rem lai laiah kawng kan cross mai si a, motor hlui lam pang leh driver junior deuh tan phei chuan Zion Street chho hi a buaithlak thin duh viau mai. Helai chho hian chanchin a nei nual ve ta mai. Vawi khat chu nu upa lam hian thil a zuar a, a thil zawrh chil lo tawk chiahin bus a rawn chho va, chu nu chuan inthlahrung takin a thil zawrhte a dahkhawm leh a, chutia lei lam bih chunga a kun lai chuan bus chu a rawn hnung tawlh leh si a, Bus hnung lam chuan a luah a hrut teuh hle bawk. A sam kha tlemin buk deuh se, han herh kir leh ngat phei se chu a hrut chiang ngawt ang ka ti!! Helai kawng chho hi siam that a ngai hle mai. Bazar luhthlakna peng bul atanga a chhak City bus stand inkar hi laih hniam chhoh ni se, Dawrpui Biak In atanga hmar lama kawngpui nen felfai taka inpawhtir ni se, kawng a ziaawm ngawt ang. Hei bakah Zion Street chho tan tirhah hian Over bridge siam nise, mipui tan a him bawk ang. Zan lamah leh zing karah Heavy load motor lian a chhoh fo avang hian a hnunga motor te leh two wheeler bakah kea kal tan a ralmuang lo hle tih kan hriat a pawimawh khawp mai. Mipuite kan him tlan nan leh traffic Jam a awm lohna turin ka ngaih pawimawh tlem chauh han tar lang lawk teh ang. 1. Zion Street kawng chho intanna Bazar luhthlakna bul hnaiah leh kawng chho chhuah chhoh tan tirh, City Bus stand pelh hret thleng hian laih zawl deuh ni se. 2. Zion Street kawng chho intanna Bazar luhthlakna bul hnaiah leh kawng chho chhuah chhoh tan tirh, City Bus stand bul velah hian a hnawk lo ang ber turin steel Overbrigde siam ni se. 3. Kawng chho lutuk laizawl deuh turin Zion Street kawng chho in tanna Bazar luhthlakna bul hnai leh kawng chho chhuah chhoh tan tirh inkarah hian a hnawk lo thei ber turin kawng ding lam leh vei lamah foot path hung nei siam ni se. Aizawl khawpui kawngpui chungchanga thu neitute hian helai kan enfiah vat loh chuan vanduaina englai pawhin kan tawk thei tih hria se, a rang lama helai kawng siam rem ni se a lawmawm ngawt ang. Tin, helai hnaia dawr leh in leh lo neite pawhin Pathian leh kan ram tan tiin sorkar tawiawm thei ila a va lawmawm dawn em! Vanduaina tawh hnua, zangnadawmna cheng nuaih hnih khat inpek ai chuan vanneih hrim hrim vang pawh ni chuang lova thawhrim vanga cheng sang hnih khat dawn hi a hlu zawk fe si a. Ni a herliam zel a, naktip nakthai maiah Krismas a rawn inher chhuak ang a, a pui a pang, a lian a te-in Zion Street kawng chhuk chho hi bazarna luhkapui berah kan nei leh ngei dawn si. Kan thuneitu lamte hian kan zavaia kan him tlanna hi kan ruahman lawk a tul hle mai. Tin, kan Aizawl kawtchhuah kawng chhiat dan em em hi ka’n tui hnih leh lawk teh ang. Patling inthlahdah fal thenkhat zun chhuak insum zo loten zan lama kawngpui an zunkhum vang ringawta diak a ni thei em??Teuh lo lutuk! Side drain mumal loh vang te, Kawngpui Black top that tawk loh vang te, Side drain-a tui luang lova kawngpuia tui lian huh zeih zuih vang te, Tui phur motor leh truck full load rit tak takten ni tin mai kawng an chil chhiat vangte leh a khat tawka kawng chhak lei min zeuh zeuh vangte pawh a ni ta ve ang. Side drain mumal awm lova kawngpui an han black top ngawt phei hi chu Ha lem vuah lova boxing khelh tum ang vel zeta him lo deuh a ni. Mumang lamah vantirhkoh rawn inlar chiah lo mah se, helai kawng chhiat chhan ber hi chu kawng siamtuten an tih tur an tih loh vang emaw, an tih reng reng loh tur an tih vang a ni tiin Synod rorel pawm bur mai ila a dik ber awm e. Kawng diak lo leh kalna tlak kawng rualrem nei tur chuan kan vai hian mawhphurhna kan nei tih a chiang hle mai. Look East Policy, chal hnawihsen, dan lo a ram inpek e.t.c tih vel aiin kawngpui tha hi Zoram mipuite chuan kan ngai pawimawh ngei ang tih hai rual ani lo ve. Zawlkhawpui kawngpui siam tha tur hian kum tin mai sum leh pai a luangral a; mahse, kan khawpui kawngah chirh diak a la luang zuih zuih zel zawng a nih hi! Kawngpui siam tha thei sorkar, engineer, contractor, politician tha kan mamawh hle a ni. Tun aia nasaa kawngpui hi kan thinlung taka kan vei a va tul em! Central lam hotu liante an rawn kal dawn chauhva siam that hi a tawk lo tih hriain Central hotute hi thla tin mai hian lo kal ziah mai se kawng chu a ziaawm ve mai ang tiin han inhnem ngawt dawn ila, kum khatah pawh pawh an rawn kal zen zen si lo va, van a duai chuang a ni tawp mai. Sawi zel tur a tam; mahse, traffic a Jam nasa a, tun hmaa motor kal theihna tura kan ngaih lohna hmun tam takah motor kan kaltir zel mai a nih hi. Lirthei a chuang leh kea kal kan him meuh tawh bawk si lo, duh tawk phawt teh ang. — - Chhungpuia