Aizawl:Power & Electricity Minister R.Lalzirliana chuan Mizorama nizung chakna hmanga kawlphetha siamna Power Plant hmasa ber Tlungvel khua ami chu Zirtawpni khan a hawng.

Hawnna thu sawiin R.Lalzirliana chuan sawrkarin kawlphetha siamchhuah a ngaihpawimawh thu leh hemi kawnga hma lakna hrang hrang zingah nizung chakna hmanga kawlphetha siamchhuah chu sawrkarin a pawi-mawhna hriain Solar Power Policy pawh duan a nih thu a sawi a. Nizung hmanga kawlphetha siamchhuahna hmunpui nia sawi Gujarat, Rajasthan leh India hmun dangte leh Mizoram dinhmun tehkhinin anni siamchhuah zat ang te chu kan siamchhuah a beisei awm lova, mahse Mizoramin lui khuap thei kan nei tha a, chuvangin lui khuapa kawlphetha siamchhuah hi loh theih lovin kan ngaihpawi-mawh thar a tul a ni, a ti.

Assembly Deputy Speaker leh Tuikum bialtu MLA ni bawk Er. Lalrinawma chuan tunlai khawvel boruak chhe zel ngaituahin nizung hmanga kawlphetha siam chu thil tha tak, environment tan pawha nghawng thalo nei lo anih thu a sawi.

SPV Power Plant Tlungvel sak hna hi August ni 13, 2018 ah tan niin November ni 5, 2020 khan a enchhinna trial run neih a ni a. He Power Plant sak nana sum rua-hman chu nuai 1400 niin Mizoram sawrkar tum vek a ni. He hna ah hian Civil leh General Component ah cheng nuai 213 sen niin Solar leh Electrical component ah cheng nuai 1187 sen a ni.

SPV Power Plant hi Tlungvel tlangah bun niin Solar Module 5340 dah a ni a, kawlphetha a siamchhuah thei tam ber chu 2 MW anih avangin 2MWp tih a ni. 1 MVA Inverter pahnih te, 1 MVA Transformer pahnih te, Evacuation line 33 KV LILO te, SCADA system pakhat te hi Power House ah bun a ni bawk a. Solar Module te tlang pharh lai-ah bun niin a cable inzamna zawng zawng belhkhawm pawh 11632 metre laia thui a ni a. Module tihfai nan Solar water pump pawh bun a ni a. SPV Power Plant hi ram acre 5 velah bun a ni a. Kumtin he plant hian kawlphetha 3 MU(million units) vel a siamchhuah generate beisei a. Kum 5 chhungin a enkawl hna Operation & Maintenance hi he Plant buntu Swastik Solar Kolkata in an ti dawn a ni.