ZALEN July 18, 2024; Vawiin 18.7.2024 (Ningani) hian MPYCC hruaitute chuan School Education Minister an hmu a. Sawrkar school zirlaibu indaih lohnaah a rang thei ang bera hma la a, lehkhabu nei kim lote hnena pe vat tura ngenna an thehlut.

MPYCC thuchhuah a tarlan a nih danin, ni 15.7.2024 (Thawhtanni) atang khan Mizorama school hrang hrangte chuan term exam hmasa ber an tan a. Hetah hian sorkar sikul (Primary & Middle, Govt. Aided) zirlaibu la dawng kim lo school 1270 chuang an la awm hi Congress Thalai chuan pawi a tiin Mizoram zirna sawpchhiatna nasa tak a thlengah Congress Thalai chuan a ngai a ni.

Mizorama zirlaite hmakhawngai taka hma la thin MZP chuan Samagra hnuaia Middle School leh Primary School-a zirlaibu la dawng kim lo a tarlan danin school 1270 (Primary school 581 leh Middle School 689) an la awm a. Aizawl District-a zirlaibu la dawn kim lohna school 309 (Primary School – 173, Middle School 136), Aizawl Municipal Corporation huamchhunga School-te Congress Thalai chuan a zirchiang a. AMC Area bikah zirlaibu dawng lo school 100 chuang zet an la awm a. Heng school-a lut tam tak chuan exam an neih tawh laia zirlaibu an la nei lo chu buaithlak an tiin exam inbuatsaih dan harsa an ti hle a. School tam takah zirlaibu hlui dapchawpin zirtirna pek an ni hlawm.

Printing & Stationary department lamin Education Department lamin order an siam ang zat an chhut hnua zirlaibu indaih lo leh dawng kim lo an la awm hi Education Minister-in a Department chan a hneh lohzia leh zirlaite bakah sorkar School-te a ngaihtuah lo tih a tichiang hleah Congress thalai chuan an ngai a. Naupang leh school zat zir chiang hmasa lovin lehkhabu an order tawp tih a lang chiang hle a. Education Minister-in zirlaibu chhut dan chu sorkar kal tawh tih dan nen a in ang reng a ti chuan a lakah beiseina thar, kalphung thar a awm loh zia a tichiangah Congress thalai chuan a ngai.

Education Minister hian a mawhphurhna a hlen lo a, zirlaibu indaih chungchangah engmah insawifiah thei lova Printing & Stationary department leh SCERT hotute a insawifiah tir hian a department chan a chian loh zia a lantir bakah Department dangte nen an thawhhona a tha lo tih pawh a tarlang chiang hleah Congress thalai chuan a ngai bawk.

Education department hnuaiah hian ZPM sorkar hnuah kumin 2024 kum tir lam khan Question leak-out a lo awm tawh bakah Casual teacher lak chungchangah pawh thil fel lo leh sawi-sep a tam hle a. He'ng thil fel lo thleng fo hi Education Minister hian a mawhah ngai lo niawm takin a ṭawng chhuak duh lo a. Zirlaite harsatna tawh sukiang tura engtik lai pawha awm tura ngaih Education Minister-in harsatna sutkian a nih theihna tura amah hmuh tum MZP hruaitute pawh naute birthday chhuanlama a hmu duh lote hian Mizoram zirna sawpchhiat vek a pawisak lohzia leh MZP hruaitute leh zirlaite zah lohnaah Congress thalai chuan a ngai a ni.

Printing & Stationery Minister F. Rodingliana'n MZP hruaitute hnenah zirlaite harsatna hrethiama zirlaibu chhut a nih nghal theih nan ama Department sum atanga zirlaibu chhut nghal vat a nih tur thu a lo sawi laiin Education Minister chuan zirlaibu daih lo chhutna man tur Chief Minister a sawipui tih a sawi leh lawi si hian an thu a in hmu loh bakah an thawhhona a chhe hleah Congress thalai chuan a ngai a. Education Minister Vanlalthlana aia Printing & Stationary Minister F. Rodingliana chu Mizorama zirna leh zirlaite hmakhaw ngaitu minister a nih zawk zia leh Education Minister hian a department chan a hneh lohzia sawimam tum lovin midang kuta hlan ngam zawk turin MPYCC chuan a ngen.

First term exam an neih mek laia zirlaiten zirlaibu an la dawng kim lo hian Education Minister chak lohzia chiang takin a langah Congress Thalai chuan a ngai a. Social Media vela lar khela tal mai mai lova midang hnena mawhphurhna hlan a, a Minister nihna chawlhsan ngam turin Congress Ṭhalai chuan a phut a ni.