Aizawl July 23, 2024 : Mizo Zirlai Pawl (MZP) General Headquarters, Aizawl Executive Committee meeting vawi 632 (2023-2025 term-ah vawi 10) na chu vawiin khan MZP Conference Hall-ah neih a ni a. Zirlaibu a thlawna sem tur la sem zawh loh chungchang an sawi a, July 31, 2024 ral hma ngeia a dawng tur ten an dawng lo a nih chuan hmalak an tum.

Meeting hi MZP Vice President C. Lalremruata'n a kaihruai a, Zirlaibu a thlawna sem tur la sem zawh loh chungchang June 3, 2024 (Thawhtanni)-a MZP Executive committee meeting-in hmalak nise tia a lo rel tawh angin Meeting chuan July 31, 2024 (Nilaini) ral hma ngeia zirlaite chanvo a thlawna lehkhabu dawn tur an la dawng kimlo a nih chuan na taka hmalak nise tiin a rel a ni.

MZP chuan an hmalakna kal zelah RTI hmangin school 1270 la dawnglo tih hmuhchhuah a ni a. F. Rodingliana Printing & Stationery changtu minister chu a pisa a hmuh a ni an ti a, Education Dept. changtu Minister pawh sawipui an tum chu an hmuh theih loh thu an sawi.

MZP General Headquarters hruaitute chuan, vawiin khan Zomuantlang, Tripura nena inrina hmuna chhungkaw 13 ration card delete sak chungchangah B. Lalchhanzova, Minister Food, Civil Supplies & Consumer Affairs chu a pisa ah an hmu a, Minister chuan a tul anga zirchianna neih a nih tur thu leh Myanmar, Manipur leh Bangladesh-a kan unau raltlan mi 45000 chuang tana buhfai an dawn theihna tur central atanga cheng vbc. 5 dawn anih thu a lo hrilh a. MZP hruaitute chuan raltlan ngaihtuahtu sawrkar chungah lawmthu a sawi a ni.

MZP rorelna sang ber (Assembly) vawi 68-na Tlangsam, Champhai District a neih tur chu a hun atan ni 24th - 26th September chhunga neih tura rel a ni.