Aizawl May 30, 2023 : Vawiin khan NSUI Mizoram huaihawtin 2022-2023 HSLC leh HSSLC Topper-te lawmpuina hun Vanapa Hall-ah hman a ni a. He huna khuallian MPCC President Lalsawta chuan zirlai te chu khawvel hneh thei tura inbuatsaih turin a chah. 

MPCC President chuan tunhma zawng aiin Mizo thalaite khawvel ram dang thalaite nen tual khatah an cheng za ho ta zual a ti. Mizoram chhung mai a thawk tura an rilru an neih thin pawh India ram leh khawvel huap pawha thluak inelna kawngah inbuatsaih a, an intahhriam a ngaih thu sawiin, "Kan Mizo thalaite quality hi kan hrechiang a, tumna a awm chuan khawvel inelnaah hian a ti tha ber in ni thei tih hi kan hrechiang che u a ni. Khawvel hneh turin in rilru lo buatsaih rawh u," a ti.

Lalsawta chuan Mizoram-in a lo kalpui thin danah leh sawrkar chakna hmanga zirlaite a enkawl danahte pawh kawng thar (reforms) tam tak neih a ngai, tih sawiin, "Mipuiin Sawrkar School aia Private School an thlang tlat te hian sawrkar tan chuan siam that tur a tam tih a chiang a ni. Hei hi Congress party chuan kan ram mamawh a nih dan kan hria a, ‘Reforms’ ngai tam tak zingah kan ngaih pawimawh a ni," a ti. 

Politics chu mimal hausakna tur ni lovin ram leh mipui tih hausakna tur a ni tih sawiin, "Kan ram hian tih tak zeta ram tana thawk tur a mamawh a, vawiinah hian aw rawl chhuahin ram hmangaihtute a aukhawm mek a ni. Politics hi mimal hausakna tur a ni lo a, ram leh mipui tih hausakna hmanrua a ni tih hriaten kan party an rawn bawr khawm tan mek a, nangni pawh zirlai mai ni mah ula, Politics in ngaihtuah ang a, fim takin hun lo kal tur (future) siamtu in ni tih hriain inbuatsaih sauh sauh rawh u, a ti bawk.