Aizawl June 11, 2023: Manipur buai vanga Mizo zirlai Mizoram haw tam zawkte chu an zirna chhunzawm kawngah dinhmun laklawh takah an ding mek a. Zirlai tlem azawng te erawh Manipur-ah an let leh tawh thung.

ZALEN thudawn danin, Manipur atanga Mizoram haw zirlaite hi Regional Institute of Medical Sciences (RIMS)-a zirlai 125-te leh Central Agricultural University (CAU), Imphal-a zirlaite nen an vaiin mi 192 an ni. 

Tunah hian zirlai nu leh pate leh zirlaite nen an zirna chungchangah meeting neih tumin ruahmanna te pawh an siam a, thutlukna erawh an la siam fel lo.

RIMS-a Post Graduate zirlai exam tur mi thenkhatte leh internship tih ngei ngei ngai tlem azawng te Manipur-ah an chho tawh a, harsatna tawh an nei zui rih lo.

Manipur-a zirlai chho zat hi chiang taka hriat theih a ni lo a, Imphal-ah pawh issue thar a awm em em lo niin an rawn sawi a; mahse, zirlai nu leh paten news atanga boruak an lo hmuh danah tun maiah chuan chhoh chi-ah an ngai rih lo niin a lang.

Hetihlai hian zing dar 9 atanga tlai dar 3 inkarah online-in class erawh an rawn pe reng thung a, practical neih tam ngai 3rd - 5th semester zirlaite erawh an buai viau tawh thung.

Mizoram ang bawkin state dang zirlaite pawh zirna chhunzawm tura Manipur kal leh an la awm lo nia thudawn ni bawkin, state dang zirlaite pawhin online class hi an zawm nia thudawn a ni.