Tuipuiral Zirlai Pawl (TZP) chuan an huam chhung atanga mi hmingthate an chawimawi a, an zingah hian Dr. HTC Lalrinchhana, Special Judge, Prevention of Corruption Act pawh a tel.

TZP hian Inrinni khan Aizawlah bialtu MLA, Ramthanmawia hova Freshers' Social hmangin Tuipuiral chhulchhuak mi hmingtha mi pali an chawimawi a. Dr. HTC Lalrinchhana bakah hian nungcha leh ramngaw humhalhtu, V.L. Bela; Eco Far dintu, Lalthlamuani leh Weightlifting Championship 2023-a gold medal latu, Lalruatfela hnenah chawimawina an hlan.

Mi hmingthate bakah hian an huam chhung sikul atanga HSLC leh HSSLC distinction-a pass thar mi pariat hnenah MLA Award (laptop) an hlan bawk.

Lalnunsanga, Vice President, TZP kaihhruai Freshers' Social-ah hian bialtu MLA chuan an bial chu Mizote Mizo berna hmun, a taka an la nunpuina hmun a nih thu leh bialtu MLA a ni thei chu a lawm tak zet tih a sawi.

TZP nena an thawh dunna a that avangin zirtirtu indaih lohna pawh phuhruk a nih thu leh sikul thawm that, kawng leh thil dangah pawh theihtawp chhuaha hma an lak thin thu a sawi bawk.

TZP President K.R. Lalmuankima chuan September thla tawpah an biala MLA chuh turte pualin Tuipuiral Hmathlir Programme buatsaih an tum tih a puang bawk.

Freshers Social-ah hian chawhnuah leadership training neiin Lalhmachhuana Zofa, Editor, Diktawn chu resource person atan an hmang.