Aizawl: Zirtawpni kalta zan tira thlipui leh ruah sur chuan hmun hrang hrangah chhiatna a thlen a, in tihchhiat engemaw zat a nei a, mihring thi leh hliam erawh an awm lo thung.

Thlipui hian ITI vengah chenna in 2 leh Health department quarters 2 chu a chhem chhia a. Govt. Complex vengah chenna in luah lai 14 chu a chung rangva a hâwk a, Venghlui ah thing tlu in in pakhat a delh chhia a. Hei bakah hian hmun hrang hrangah chhiatna thleng a awm bawk.

Aizawl South II MLA Lalchhuanthana chuan AMC Ward XVIII Malsawmzuala Ralte leh XIX Councillor Baryl Vanneihsangi Tlau te nen nimin khan ITI veng chhunga in leh lo chhia te an tlawh a, chenna in chhia te hi R. Sangzika leh PC. Sangliani te bakah Health Department quarters chhungkaw 2 luah lai te a ni. MLA hian chhiatna thleng chu pawi a tih thu sawiin hnatlang thingpui in nan Rs. 3000 a pe a ni.

Govt. Complex ah pawh in luah lai 14 chu a chung rangva hâwk avangin nimin khan Govt. Complex Local Council kaihhruaiin hnatlang neih a ni a, thingkung tlu leh lungrem chimin kawng a block a, electric hrui hmun thumah a tichat bawk a ni. Govt. Complex chhiatna thlenna hmun hi Aizawl West-I bialtu MLA Zothantluanga leh AMC Ward X councillor Chuauzikpuii te chuan an tlawh.

Phunchawng vengah pawh chenna in pakhat rangva chung a háwk bawk a. Aizawl Zotlang Presbyterian Kohhran Biak in hmun tur laih mek pawh a min nasa hle a, hnatlangin senghawi hna thawh a ni bawk.

Venghlui ah pawh Remsanga in, Ramfangzauva te luahlai chu a bula thing tlu in a delh a,  a neitute hi vanneihthlak takin a delh fuh lo hlauh. Hei bakah hian thing tlu in Lalhlimpuii w/o C.Lalremsiama (L) te car chu a tichhe bawk. College veng, Republic Vengthlang leh Dinthar vengah te chenna in a tichhia nia thudawn a ni.