Aizawl August 27, 2022 : Govt Thangpui Primary School, Thangpui khua Lunglei district-a August 24 leh 25-a thil thleng chungchang chu MZP General Headquarters chuan an hriatthiam theih loh thu thuchhuah siamin an tarlang. Sikul naupang, hmeichhia leh nghal saruaka haw tirtu zirtirtu chu hremna pek mai piah lamah a hna chelh chhunzawm tlaka an ngaih loh thu an tarlang bawk.

MZP thuchhuakin a tarlan danin, zirlai naupang pakhatin a zirlaipuite kut a tawrh chungchangah, Lunglei South huamchhunga Govt. Thangpui Primary School zirtirtu chuan remna siam tum lovin an zirlai sikul uniform chu hlihsakin saruakin a haw tir chu hriatthiam har kan tiin kan dem tak zet. He harsatna thlen avanga zirlaiin damdawiin (John William Hospital, Lunglei) a enkawl ngai hial khawpa a tuar hi MZP chuan pawi an tih thu an tarlang.

MZP chuan he thu hi in a hriat ve leh hma la nghalin sikul thuneitute pawh a be pawp nghal a, a tul anga hma la turin an ngen nghal a. Hmeichhe naupang pawl khat zirlai sikul uniform haklai hlihsaka hawtirtu Lalbiakengi, SSA teacher chuan Human Rights nasa tak a bawhchhiat avangin zirtirna hna hi chhunzawm zel tlakah MZP chuan an ngai loh thu an tarlang. "Hremna mai piah lamah dan anga a hna atanga chawlhtir ngei turin thuneitute kan phut a ni," an ti. 

MZP chu zirlai pawl am nih angin Mizo zirlaite tan engtiklai pawhin a ding reng dawn an ti a, August 24 leh 25 a thil thleng ang hi eng zirna inah mah thleng nawn tawh lo turin sikul thuneitute leh thawktute a ngen. MZP chuan, John William Hospital, Lunglei-a enkawl mek zirlai hi cheng sanghnih (2000) in a kan a ni.