ZALEN July 7, 2025 : Vawiin khan Mizo Students’ Union (MSU), General Headquarters buatsaihin “Quality Education Humhalhna Kawng Zawh” neih a ni a, Vanapa Hall Kawt atangin Higher & Technical Education Directorate Office Kawt thleng neih a ni. Sawrkar lam chuan dan anga hma lak a, unqualified teacher te chu ban an tum thu an sawi hnuah kawngzawh hi resolution siamin tihtawp a ni.

Kawng zawh programme hmasa hi Vanapa Hall kawtah neih a ni a. He hunah hian MSU GS Zodinsanga GSchuan Chairman niin a kaihruai a, AGS Lalriatpuia chuan Report a pe a ni. Tin, he hunah hian MSU President B. Lalkhawngaihzuala, Joint Hnampual President K Jerome leh ACCJSU GS Lalduhsaka te thu an sawi a ni. 

President B. Lalkhawngaihzuala chuan Unqualified Teacher te chance a pek fo chu MSU in tha a tih loh thu a sawi a. Tuna an chance pek pawh hi nakumah chance an pe nawn leh lo ang tih a sawi theih loh thu a sawi a. Ram hruaituten Central Service tling tura zirlai te fuih reng chung si a, Qualified lo Ziritrtu an ruai reng chu hriatthiam harsa a tih thu a sawi a. MSU ngenna Sawrkarin a tihlawhtling lo anih chuan a tawp thlenga na taka hmalak an tum thu a sawi a ni.

Hun hnihna hi H&TE kawtah hman a ni a. He hunah hian MSU Treasurer Lalrampanmawia chuan Chairman niin a kaihruai a, Vice President Roluahpuia chuan thu a sawi bawk. 

Roluahpuia pawhin Qualified Teacher nilo Zirtirtu te, an phaklo chung Zirtirna hna an thawk reng chu zahpuiawm atih thu a sawi a. A rang thei ang bera ban turin Mizoram sawrkar an ngen tih a sawi bawk. 

Kawng zawh hun hnihna Higher & Technical Education kawta hman anih lai hian Sawrkar hruaitute nen MSU lam aiawhte inbiakna neih a ni a. Sawrkar chuan Dan an zawm a ngaih thu leh, MSU nawrna avanga Showcause notice an pek mek avangin, hemi chinfel hnu ni nga (5) chhunga ban an tum thu an sawi avangin Resolution siamin kawng zawh hi an titawp a ni. 

Resolution chu hetiang hian siam a ni : 

1. Sawrkar in heng Assistant Professors Unqualified te lakah Dan ang taka ban an nih theih nana Showcause notice ni 15 chhung an pe hi tha kan ti a, Showcause Notice hun chhung a liam atanga ni 5 chhungin ban an nih tur thu an sawi hi kan ring tawk a, sawrkar pawh an thutiama ding ngei turin kan ti. 

2. Tun hnu ah Zirtirtu hnalak reng reng ah, Qualified teachers te chauh lak thin ni tawh rawh se. 

3. Tun a Asst Professor Qualify lo te hi an aiawh Asst Professor tur Qualify ngei a ranglamin la rawh se.