September 7, 2022; Health minister Dr. R. Lalthangliana'n Zoram Medical College (ZMC) a MBBS zirlai (1st batch) te chu India ram khawi hmun pawh a hman theih vek tura ngaih an nih thu leh nakum chawhma lamah Medical Commission of India in endikna hnuhnung ber an rawn neih a rin thu house a hrilh.

Vawiin Assembly session zawhna leh chhanna hunah member te zawhna leh zawh belhna te chhangin health minister chuan, ZMC a zir mek MBBS 1st batch mi 100 bawr ten nakum kumtawp ah course an zo dawn tih sawiin, nakum chawhma lamah Medical Commission of India lamin last inspection an rawn neih a rin thu leh chumi chu an paltlang chuan nakum kumtawp lamah rah duhawm tak chhuahin Doctor engemawzah neih belh theih beisei a ni tih a sawi. ZMC chungchangah Medical Commission of India te dawr thin an nih thu leh Covid vanga harsatna an tawh te thlen a nih thin thu a sawi bawk.

ZMC a Doctor zir mek te qualification chungchangah member te zawh belhna chhangin health minister chuan, India ram khawi hmun pawh a thawk thei tur a ngaih an ni tih a sawi.

Health minister sawi danin, tun dinhmunah Doctor post ruak 67 awm mekin, pension leh thiamna sang zawk zir te an awm a, chungte vang chuan PHC tam tak leh Doctor dahna tur tam tak ah Doctor indaih lohna a thleng mek.