Aizawl : Positive avanga Dedicated Covid Hospital (DCH) tana tih bik Zoram Medical College (ZMC)-a Local Level Task Force member dah luh pahnih chu an test man leh damdawi man chawitir an ni.

LLTF member hi positive a ni tih hriat a nih hnuah an chenna atanga Ambulance a phurh phei niin ZMC-ah hian test hrang hrang neih tir leh an ni a, an mahni hian LLTF member an ni tih an sawi hnuah pawh test senso zawng zawng leh a damdawi man pawh chawi tir vek an ni.

LLTF member chuan, "Mi dang pawhin nangni chu an free vek dawn che u a ni lawm ni, min ti a, kan zinga awm ve veng dang a mi chuan LLTF member a nih thu a zuk sawi a, mahse, ZMC lam hian sawrkar hnathawk chu kan la zel tho, tiin an lo sawi a, kei phei chuan ka zuk sawi ve ta lem lo a, an tih ang chu ka chawi ve ta mai a ni," tiin ZALEN a hrilh.

"Sawrkar hian an thuchhuah-ah LLTF member te a thlawna a enkawl tur thu an sawi a, sawrkar hnathawk leh thawk lo lam a sawi miah bawk si lo a, a mak kan ti khawp mai," tiin a sawi zui bawk.