Aizawl April 24, 2023 : Health Minister Dr R. Lalthangliana chuan ni 22.4.23 khan New Delhi-ah National Medical Commission (NMC) hotute a dawr a. NMC hotute hian Zoram Medical College (ZMC) chu MBBS pass thar te internship tih nan an remti.

Health Minister leh Dr VK Paul, Member Niti Aayog te chuan NMC Chairman leh NMC-a thuneitu sang (Advisers, Board Member) te dawr in, ni 22.4.2023 khan ZMCa MBBS batch hmasa ber te chu Internship program tan nghal turin an remti ta a ni.

ZMC a zirchhuak MBBS te bakah, Foreign Medical Graduate te tan seat riat (8) internship tih phalna, NMC hian a pe bawk a ni.

January ni 9, 2023 khan NMC Assessors te'n ZMC inspection an nei tawh a. Tlakchham (deficiency) thenkhat la awm te chu sawrkarin a tih puitling chho avangin phalna hi an pek phah a ni. March khan Mizoram University chuan MBBS final Exam buatsaih in, result a tichhuak tawh bawk a ni.