Aizawl July 20, 2022 : MNF Thalai chuan thuchhuah siamin Zoram Medical College in hma a sawn zel an ti a, National Medical Commission (NMC) pawhin batch lina tur hawn a phalsak leh tawh a, final inspection te hmachhawn turin an inbuatsaih tiin, ZMC chu MZU hnuaia affiliate thlap a nih thu an tarlang.  

MNYF chuan ZMC chu National  Medical Comission (NMC) in 17.08.2021khan 4th Batch (full Course) hawn a rawn phalsak tih an tarlang a,  1st Batch-te hian kum 2023 Final-ah exam an hmachhawn thei tur chu lawmawm an tih thu leh  zirlaite pawh duhsakna kan hlan nghal tih an tarlang. 

Final Inspection nei tur hian NMC lam te lo kal mai tura beisei reng a ni, an ti a, rawn kal an rawn tum hmasak zawk hi Covid len avanga thulh a nin tiin, ZMC lam pawh Inspection team-te hmachhawn thei tur hian a inbuatsaih reng a ni, an ti bawk.

MNF Thalai chuan, "ZMC hi Technical Institution dangte ang bawkin MZU-a in affiliate niin degree pawh an pek tur a ni a, tunhnai maia MZU team-te'n Inspection an neihah dinhmun tha takah a ding niin kan hria. Hetianga ZMC-in boruak tha tak leh hmalam eng tak a neih laia MLA zahawm tak Pu Lalchhuanthanga’n ZMC-a zirlaite tana ngaihthlak nuam lo zawng leh ZMC hmel timawk thei zawnga thu a sawi mai hi MNYF-te chuan a pawi kan tiin awm lo kan ti tak zet a ni," an ti.

MNF thalaite chuan ZMC-in hma a sawn chhoh zel nana sorkarin theihtawp a chhuah chu lawmawm kan ti hle, an ti a, ZMC-ah Faculty leh Resident-ah mi 146 awmin heng zingah hian Professor -11, Associate Professor - 21 leh Assistant Professor - 38 an awm mek. Tunah hian lak tawh sa zawm mai tur Professor -1 awmin Professor - 6 leh Associate Professor - 6 lakna tur Advertisement chhuah mek bawk a ni, an ti.  ZMC-a Faculty Recruitement hi ZMC bye-law in a sawi angin, Chief Secretary Chairman-na hnuaiah subject expert-te member niin MCI /NMC duh dan angin thin a ni.