Aizawl: Zoram Medical College chuan ZMC laboratory a tunlaia swab sampletest chung-changah an dinhmun chungchang an sawi a, test an tih chak loh chhan leh an khawl thar neih avangin duh anga test ti chak thei lo an nih thu thuchhuah an siam. ZMC-a thuneitute chuan, “ZMC Covid-19 laboratory ah April ni 7, 2020 atang khan RT-PCR khawl hmanga Covid-19 sample testing neih tan niin, tunah hian sample 3906 chuang hi test a ni tawh a. Tunhnaiah hian sawrkar thuthlukna in sawrkar Quarantine Facility (QF) a awm mek leh chhuak tawh zawng zawng leh lo haw apiang te chu RT-PCR khawl hmanga an sample hi test tur a ruahman a ni a. Amaherawhchu, tuna Quarantine Facilities-a awm mekte atanga sample lak bakah hian sample test tur awmsa (backlog) a la awm avangin duh angin test a chak thei lo deuh a ni," an ti.

Khawl thar an neih avanga an buaina chungchang an sawinaah ZMC chuan, "Imphal atangin RT-PCR khawl thar neih belh a ni a, hemi bakah hian Automated RNA extractor SDRF sum hmanga lei a ni bawk. Heng khawl te hi hman theih tura ruahman (caliberation) leh enchhin phawt (test run) ngai an ni a, heng te hi bun fel tak tak a nih chuan, tun aia nasa in test tam lamah hma kan sawn dawn a. Amaherawhchu, khawl hman tur reagent hrang hrangte hi kan leina hmun atangin tam tham tak vawikhatah lei theih a ni lova, hengte avang hian RT-PCR test hi tun dinhmunah chuan duh anga tamin kan ti thei rih lo. Tunah hian nikhatah samples 400 chuang test thin a ni a, hun reilo te-ah tun aia tam zawk test ti thei turin hmalak mek a ni.” an ti bawk.