Lunglei: ZPM Southern Headquarters, Lunglei hruaitute chuan nimin khan an pisaah chanchinbumite kawmin tunlai ZNP boruak chuan chhim lam chu a nghawng ve loh thu an sawi a, executive committee chuan tuna hruai tute nilai mekte chu term thar hruaitu ni chhunzawm tura a rel thu an sawiin VC inthlanah kum 1 chauha upa ZPM-in Lunglei district-a hlawhtlinna a hmuh avangin lawmthu an sawi bawk.

ZPM Southern Headquarters hruaitute chuan ZALEN zawhna chhangin ZPM atanga ZNP anga chhuak tur thawm chhim lama an neih loh thu sawiin, “Lawngtlai thlengin kan indapa he boruak hian chhim lam ah nghawng a nei lo niin kan hria,” tiin an sawi a ni.

Covid 19 hrileng leh lockdown vangin hruaitu inthlan hun tawh mah se, inthlan theih a nih loh avangin, “Hmunpui lama kan hruaitute berawn chungin Southern Headquarters Executive Committee thukhawm chuan tuna hruaitu nilai mekte chu term khat (kum 3) atan hruaitu ni chhunzawm turin a rel a ni,” tiin media mite an hrilh.

VC inthlan thlirletin duhthusam lo lai a tam chhan chu rua-hmanna siamtu Sawrkar lam zawk an nih avangin election official duty te chu dem mai loa hrethiam turin mipuite an ngensak bawk a. Kum 60 laia upa tawh leh hlun zawk MNF leh Congress party te khaikhin chuan kum 1 chauha la upa ZPM chuan Lunglei district-ah seat 42 laa, VC 9 leh thawhhona nen VC 3 an la thei chu hlawhtlinnaah an ngaih thu an sawi bawk a ni.