Ram pawna Zo hnahthlak awm, an awmnaa buaina a awm avanga Mizorama tlanchhiaa awm mekte leh an awm hmuna harsatna tawkte tan kohhrante an che chhuak zel a, tanpuina pawh an pek chhunzawm zel.

Baptist Church of Mizoram (BCM) hnuaia Aizawl Area Development Committee leh Relief & Development (R&D) tangkawp chuan Inrinni hmasa khan Baptist Centre, Falkland-ah Sihhmui, Sairang, Lengpui, Khamrang leh Aizawla raltlan awmte tanpuina an sem a. ADC member leh bial leh tualchhung kohhran hruaitu te, area TKP Coordination hruaituten an tawiawm.

He hun hi Upa Lallianzuala Hnamte, Chairman, AADC-in kaihruaiin Rev. R. Lalrintluanga, Executive Secretary-in tanpuina sem a nih dan sawiin, R&D atang leh Aizawl Area Relief fund atanga pek a nih thu a tar lang.

Tun tumah hian raltlan chhungkaw 78 hnenah Rs. nuai 2 man hu buhfai bag sem a ni.

Mizoram UPC hnuaia Tanpuitu Hmeichhe Pawl Executive Board pawhin Manipur-a buaina tawk mekte tanpuina pek dan tur an ngaihtuah a. Bial tin LAD inkhawmpuiah thawhlawm vawi khat theuh lakkhawm an rel a, hemi hmang hian puih ni se an ti a ni.

Mizoram thenawm, Myanmar leh Manipur-a Zo hnahthlakte hian tun hnaiah harsatna hrang hrang tawkin tam tak Mizoramah an tlanchhia a, thenkhat erawh an awmhmun pangngaiah awmin nun hrehawm tak an hmang a. Heng mite tan hian kohhhran hrang hrang an che chhuak nasa hle tawh a ni.