ZALEN March 2, 2025 : Mizote kût ngaihhlut ber, Chapchar Kût chu Aizawl Lammual-ah Ningani leh Zirtawpni hian hman a ni dawn a, kût hmanna atan hian Mizoram sawrkar chuan kum kal mek budget-ah Rs. Nuai 100 a dah a. Kumina thupui hman tur chu ‘Zo nun ze mawi - Hawihhawmna’ tih a ni ang.

Chapchar Kût hmanna pui ber hi Aizawl Lammualah March 6 leh 7-ah neih tura duan a ni a. Ni khatnaah hian K. Sapdanga, Home Minister chu khuallian a ni ang a, ni hnihah Chief Minister Lalduhoma khuallian a ni ang a. Kût denchhen programme pawimawh dangte erawh chu Thawhtanni atanga kalpui tan tur a ni.

Thawhtanniah kût pual tlan (Kût Run) buatsaih a ni ang a, Thawhlehniah Flower Show leh Painting & Exhibition Show kalpui tan a ni ang a. Nilainiah Chapchar Kût heritage tour buatsaih a ni ang a, he mi ni vek hian Falkawn Zokhua-ah Mizo Pi leh pute Nun (Mizo Typical Life) Demonstration buatsaih tan a ni ang. Nilainiah vek hian kût pual Handloom, Textile & Handicraft Exhibition and Food Processing & Food Court hawn a ni ang.

A tuk, Ningani-ah pawh neih chhunzawm tur a ni a, Lammual-ah huan hman tan tur a ni a, a tuk Zirtawpni-ah a hmanna pui ber chu neih tur a ni a, hemi ni hi chuan programme hrang hrang hman a ni a, tlai lamah concert neih thin a ni a. Exhibition & food court hian Zirtawpni thleng a awh ang.

Chapchar Kût hmanna tur sum hi tun hmain a hranin sawrkarin budget-ah a dah hrang ngai lo a. Kumin sawrkar budget atang khan Rs. Nuai 100 dah tan a ni a. Hei hian mamawh zawng zawng a daih loh avangin sum hmuh belh theihna tur dangte Chapchar Kût 2025 Organising Committee chuan a ngaihtuah nia thudawn a ni.

Art & Culture department SPIO-in ZALEN RTI zawhna a lo chhan tawh danin, Chapchar Kût 2024, Mizoram puma lawmna atan Rs. Nuai 129.69 hman a ni.