Aizawl: Zofa hmun hrang hranga awm te harsatna tawh sutkianpuia thawhpui tur pawl Global Mizo Council chu tunhnai khan din a ni a. Greater Mizoram buaipui tur anga sawi a nih laiin Mizo Nation Integration lam an hrut tur zawk thu an sawi. He pawl hian sawrkar leh NGO te tih remlo thlenga tih an tum.

ZALEN-in Golbal Mizo Council general secretary Lianzuala a biaknaah an pawl chu mi thahnem ngai (senior & leading citizens) mi 17 kalkhawm ten June 7,2023 khan an din tih a sawi a. "Kan hnamin harsatna a tawh te sutkianpui tura din kan ni a. Khawvel hmun hrang hranga awmte inpumkhat a, zai khata luan leh kan harsatna tawha inpuihtawn leh insuihkhawm hi kan tum ber a ni," a ti.

Sawrkar leh tlawmngai pawlte tih remlo te an hmachhawn dawn tih sawiin Lianzuala chuan, "Raltlan lo lut chungchangah pawh sawrkar, kohhran leh tlawmngai pawl te hmalakna hi tha kan ti a. Mahse an tana tih remlo engemaw zat a awm a, hengah te hian hmalak kan tum a ni," a ti. Hetih rual hian ralthuam lek zawng chuan hmalak an tum lo tih a sawi a. Golbal Mizo Council pawl hruaitute chuan July ni 4,2023 khan Manipur tlawhin Zo hnahthlak chi/hnam hrang hrang te kawmin an harsatna te an sawipui bakah Mizo hnama luankhawm dan te a awm leh awm loh an zawt a. Hnam hrang hrang ten tha an ti hle niin a sawi bawk.

Golbal Mizo Council hian hruaitu atan heng mite hi an ruat
Chairman - Vanlalngaia  
Vice chairman - JH Rothangliana
General Secretary - Lianzuala
Secretary - H.Lalrinmawia
Treasurer - Phillip Vanlalmawia John
Fin.Secy. - PC Nundanga
Heng mite bakah hian Adviser an ruat bawk.