November 24, 2022; September, 2022-a Zonuam, Aizawla hmeichhe naute pakhat pawngsual ni ngeia doctor-te'n an hriat kaihhnawiha man, naute nu leh pate chu polygraph tests (lie detector) hmangin thu zawhfiah an ni dawn.

Vawiin a a office a thuthar thehdarhtute a kawmna ah ZALEN zawhna chhangin Aizawl SP C. Lalruaia chuan, naute nu leh pate chu lie detector hmangin thu zawhfiah an ni dawn tih a sawi a, hetihlai hian Mizoramin lie detector kan neih loh vangin, Delhi a Central Forensic Laboratory atangin mithiam an lokal dawn tih a sawi.

Aizawl SP sawi danin, Central Forensic Laboratory mi leh sa te chu December thla ah an lokal dawn a, an rawn kalna tur thlawhna ticket pawh ruahman a ni tawh a, thu an zawhfiah ni tur pawh tihfel ni tawhin, chumi tur chuan court atangin phalna pawh neih tawh a ni.

Zonuam, Aizawl a naute pakhat pawngsual ni ngeia hriat chungchangah hian naute nu leh pa te chu police kutah engemawchen an awm a, police ten thu zawtfiah nual tawh mah se, pawngsualtu finfiah theihna tur thu hriat an nei lo a, chumi hnuah judicial custody ah lak an ni a, tun din dinhmunah chuan bail a chhuak lailawk rih an ni.