Aizawl; Bairabi Zophaia Asssam miten masjid (mosolman biakin) an sakna hmuna 1st IR duty Laldintluanga Ralte chu helai hmuna awm hnam dangten dawta an hek vangin Assam police-ten an man chu nizan khan hruai haw a ni. He thil thleng vang hian MZP sub-hqrs, Bairabi chuan nimin atang khan Bairaibi-ah vai curfew an puang a, nimin tlai dar 4 atang khan Zophai bula Covid screeining point ah an duty nghal.  MZP te hian lirthei an dang vek a; mahse, police hi chhuah a nih hnuah an titawp leh a ni.

Bairabi OC hnen atanga ZALEN thudawn danin Zirtawpni chawhnu dar 1 vel khan Laldintluanga hi Ramnathpur police-ten manin, police station-ah an hruai a, man a nih chhan hi Zophai chhehvel a awm hnamdang thenkhat ten puak thei thil kawl nia an hek vang a ni.

He thil thleng hi an hriat veleh Bairabi OC leh a staff thenkhatte chuan Zirtawpni vek khan Ramnathpur police station pan nghalin, Assam police-te inbiakna a neihpui nghal a, nimin lam khan Laldintluanga hi thubuai siam-sak loa hruai haw theih an beisei niin Bairabi OC chuan sawiin, hek a nihna chu thu belhchiandawl lo a nih thu a sawi.

MZP sub-hqrs, Bairabi chuan, October 30, 2021, tlai dar 4 ral hmaa Assam police-ten an rawn chhuah lo a nih chuan tiam chin awm lovin Bairabi kawng atanga Mizoram a vai motor lut leh chhuak tur dan an tum tih an sawi a, nimin atang khan Bairabi ah hnamdang vai curfew an puang hman a ni.