Hemi chungchangah hian February 17, 2020 khan Kolasib District Magistrate Dr. H. Lalthlangliana chuan order chhuahin, Bairabi Zophaia leilet nei zawng zawngte chu a theih chin chinah Zohnahthlak ngei chhawr tum tura hriattir an ni a. Hnathawka chhawr tur Zohnahthlak hmu lo tan Mizoram khua leh tui dik tak chauh chhawr tura hriattir an ni.

Zohnahthlak emaw, Mizoram mi leh sa dik tak emaw chhawr tur nei lo, hnam dang Mizoram pawna mi chhawr tur reng rengin, an mi chhawr turte dan angin ILP an siamsak ngei tur a ni a, ILP siamsak loa hnam dang chhawrte chu an chungah dan angin action lak a ni ang.

State pawn leh chhunga hnam dang chhawr reng rengin an mi chhawrte an chhawr hmain intiamkamna felfai tak an ziahpui ngei tur a ni a, intiamkamna an siamah chuan a neituin rem a tih chin chauh an leileta chen leh enkawl phalsak an ni tih thu ziah tel tur a ni a, agreement chu hun chhung/hunbi neiin siam tur a nih bakah agreement copy chu DC office, Kolasibah theh luh tur a ni.

Jt. Village Council Bairabi hruaitute chuan Zophai leilet enkawltu hnam dang chhungkaw eng emaw zahte chu Assam sorkar hnena Mizo leilet chuhpuitute leh Mizo hek thintute an nih thu ZALEN an hrilh a, kum rei tak leilet enkawl a lo awm tawh an nih a vangin an huangtau hle niin an sawi. Mizoten kut an tawrh hnuin leilet enkawltute hi Zophaiah tun thlengin an la awm ngam lo nia thudawn a ni.