Aizawl May 3, 2024 : Mizorama MBBS zirna awm chhun Zoram Medical College-a kum 2018 Batch zirlai mi 95 te Graduation Day chu vawiin khan ZMC, Falkawn ah hman a ni.

Zoram Medical College kum 2018 August thlaa hawn anih atanga batch hmasa ber kum 2018-a bultan MBBS zirlai Graduate lawmna hun hi Health and Family Welfare Department Principal Secretary Esther Lalruatkimi chuan khuallian niin a hman pui a, zirlai ti tha te hnenah lawmman a hlan bawk a ni.

Khuallian chuan zirlai graduate thar te chu a lawmpui thu sawiin zirchhuak tawh mahse an zir chhuah lantir theih nan bul an tan dawn chauh tih sawiin kum lo la awm zel turah leh hna an thawhna hmunah hmasawn tum zel turin a chah a, kum lo la awm tur chu an tan a pawimawh tih sawiin Doctor tam tak zir hunlaia ti tha si a hnua an hnathawh kawnga tha si lo leh ruihhlo in a tihbuai tak te an awm a ti a, zirlai kalchhuakte tur te chu an hma hun a pawimawh zia hriaa uluk taka an hnathawhna apiangah Pathian hre reng turin a chah a, zir belh zel an duh pawhin mahni tumah chiang turin a chah bawk.

Esther Lalruatkimi chuan Zoram Medical College puitling tak Mizoram in a neih na kawngah harsatna hrang hrang an tawk a ti a, miin an ring tawk lo thin tih sawiin thenkhatin khawi atangin ruang zai tur an hmuh ang tiin sawiselna tam tak an tawk a ti am hetiang karah theihtawpin hmalak ani tih sawiin khatih hunlaia Minister te nen nasa takin sawrkar laipuiah college puitling din anih theih nana hmalak ani tih sawiin vawiin hmel an hmu ta chu lawmawm atih thu a sawi.

Vawiina zirlai Graduate thar te hi an vaiin 95 an ni a, an zingah hian hmeichhia 57 awmin mipa 38 an awm a, heng zingah hian state chhung atanga zirlai 72 awmin All India quota atanga zirlai mi 10 awmin Non Resident Indian quota atangin zirlai 13 an awm bawk a ni.

Zoram Medical College hi kum 2018 August ni 7 khan hawn niin a tuk atangin class tan nghal a ni a, a tirah zirlai 100 lak niin zirlai pakhat hnawhchhuah bakah zirlai 2 thi an awm a, heng bakah hian zirlai 2 ten hlawhtlinna an chang zo rih lo a, tun dinhmunah ZMC ah hian course chi hrang hrang zir theih 22 a awm mek a ni.