Aizawl April 4, 2022 : Vawiin khan Zoram Thar Zofate Lairelna Inpui hruaitute chuan Rev. Dr. Zaichhawna Hlawndo hovin Chanchinbumite kawmna Aizawl Press Club ah an nei. 

Rev. Dr. Zaichhawna Hlawndo chuan Zofate zawng zawng ta tur Zofate Pathian Biakinpui chu sak tan theih tawh tur a nih thu a sawi a. Biakinpui hlimthla drawing pawh a tlangzarh nghal bawk. "Vawiin hi Zofate tana hun pawimawh ber Thlarau Thianghlim kan ramah a in larna ni, Zofate Lalpa Pathian in Thlarau Thianghlim hriak min thih ni a, Biakinpui hlimthla tlangzarh hi a hun dik tak a ni," a ti bawk. He Biakinpui neitu chu Zofate kan nih angin  hnam hnatlangin kan vaia tangrualin Biakinpui kan sa dawn a. Khawvel in mak a ti hle dawn a ni a ti bawk. 

Zofate Pathian Biakinpui  sak dan tur, a hmel hmang leh a hman dan tur Pathian atanga a dawn dan te Rev. Dr. Zaichhawna Hlawndo hian a sawi a. He Biakinpui hi Khawvel puma hnam tinrengte hip khawmtu a nih dawn avangin khawvela Kristiante Pathian Biakin lian ber a ni ang, a ti. Dr. Zaichhawna hian chanchinbumite a kawm tum hian he Biakinpui hi kum thum chhunga zak zawh hman a beisei thu a sawi.

Biakinpui ram zau zawng tur hi 23809.52 square metres (Bigha 17.79) a ni a, khawvela Biakin lian ber ni lai mek St Peter’s Basillica hi Square metres 23000 niin, Zofate Pathian Biakinpui hi Square metres 809.52 in a lian zawk dawn a ni, a ti.

Biakinpui hi a dung leh vang feet 270 a ni dawn a. A san zawng hi feet 177 a ni ang. Lamtual zau zawng hi feet 80 hawlhtlang a ni ang. Biakin chhungah hian thutna 30000 dah a ni ang. Biakin hung chhung ah hian mihring 70000 vel din theihna tur a ni ang. Kawngkhar pui 12 a nei anga, chung kawngkhar 12 chuan pindan 12 a nei ang a, chung pindan te chuan hming an neih vek tur thu a sawi.