Aizawl: BJP Mizoram Headquarters chuan vawiin December 29, 2022 (Thursday) hian BJP State Office 'Mipui Run' ah 'Good Governance Day' pualin hun an hmang a, State President Vanlalhmuaka chuan, Tuna a lan danah chuan Mizorama sawrkarna chelh mek Zoramthanga kaihhruai sawrkar ah hian Good Governance hi a takin a lang lo, tiin pawi a tih thu a sawi. 

Good Governance Day hi Atal Bihari Vajpayee piancham pualin December 25ah India ram pumah hman tura tih a ni a, Kristian State te tan chuan December 25 hi Krismas ni a nih avangin, hemi ni pual hian mahni remchan hunah hman thin a ni.

Vanlalhmuaka chuan, “Good Governance Day hi Christian State te chuan an remchan dan a zirin a hun sawnin an hmang mai thin a, chutiangin keini BJP Mizoram State pawhin vawiin hian kan hmang a ni. Good Governance Day in a tum chu sawrkar tha leh dik mipui tana sawrkar tha neih hi a ni a, sawrkar tha siamna tur kawng tam tak a awm a, keini Mizoram ah hian Good Governance a awm em? tih hi kan en tur a ni. Tuna a lan danah chuan Mizorama sawrkarna chelh mek Pu Zoramthanga kaihhruai sawrkar ah hian Good Governance hi a takin a lang lo hi a pawi hle. Mipui mangang au rawl kan hria a, sawrkar hnathawk te’n an thawh hlawh a hun takah pek anni thei ta bawk lova, sawrkar inrelbawlna tha kan nei lo tih a ti chiang awm e," a ti. 

Sawrkar tha din a nih theih nan hma an la zel dawn nia sawiin, "BJP sawrkarna state ah erawh ‘Good Governance’ hi a thleng zel a, chumi thlen theihna tur chuan central nen langtlang takin hma lak a ni bawk a, Mipuiin an chanvo chan tur an chang a, mipui nen inthurual takin sawrkar chu a kal thin a ni. Chuvangin BJP chuan sawrkar tha kan neih theihna turin hma kan la zel dawn a, mipui sawrkar, sawrkar tha, thleibik neilo leh mipui tana ding ngam, thutiama ding ngam sawrkar tha din turin hma kan la zel dawn a ni,” a ti.

Hmuaka chuan, “Tunhnaiah kan state thenawm te nen ramri buai kan nei a, Joint Meeting an neihnaah Mizoram sawrkar chu a ramri chin thla thum chhunga sawifiah turin an chah a nih hmel a, 'kan sawrkar hian kan ram chin hi kan chiang chiah em? Assam sawrkar hnenah chuan an pe thei em?' tih hi zawhna awm ta a ni. Thenawm state ten min zuam in min thamlo viau anih chuan kan inenfiah a ngai a, chuvangin Kan state hian sawrkar tha leh chak kan mamawh a, chumi ah chuan huaisenna a awm bawk a, chutiang sawrkar siam tur chuan keini BJP te chuan hma kan la zel dawn a ni," a ti bawk.

He hunah hian Lalramengmawii Sailo, Treasurer, State Mahila Morcha chuan Pu Atal Bihari Vajpayee chanchin tlangpui leh a hnathawh ropui zualte tih thupui hmangin thu a sawi. Wilfred L.Vanchhawng, Venghnuai chuan 'Developmental Schemes of Central Government and it’s achievements' tih hmangin thusawina hun a nei a, Dr. Zonuntluanga, General Secretary, State CSM&PC chuan 'Good Governance of Prime Minister Narendra Modi’s government' tih thupui thlan bik hmangin thusawina hun an hmang bawk

Dr. Zonuntluanga chuan, “Pu Atal Bihari Vajpayee Prime Minister a nih hnu atang khan India ramah Good Governance hi a takin kan hmelhriat chho tan a, a piancham pual hian 2014 aṭang khan ‘Good Governance Day’ hi hman a lo ni tan ta a ni. Good Governance hi sawrkar Kalphung Tha tiin kan sawifiah thei a, sawrkar tha ah chuan sawrkar chuan a mipuite a zah anga a duat tur a ni a, rualkhai takin a enkawl tur a ni, sawrkar langtlang ‘transparency’ a ni tur a ni a, hnam zawng zawng lungawi tlanna turin sawrkarin hna a thawk tur a ni,” a ti.