Aizawl February 1, 2023: MPYCC Information & Publicity Deptt chuan nimin khan MNF Returnee ten Mau tiak an phunna hmun Lengte leh Saitlaw ram an tlawh a, heng lai hmunah hian Mau puitling hmuh tur a awm lo an ti. MPYCC chuan, "A thlawna Sawrkar sum luanralna leh sum siamna chiang tak tih kan finfiah a, he project hi a hlawhchham let der a ni tih kan puang," an ti.

MPYCC chuan, "RTI Act hmanga zawhna Horticulture department-in an chhàn danin, mau/raw tiak chi thum phun tir a ni a. kum 2020 atangin loneitute hnenah mau/raw ṭiak 8,49,425 an sem tawh a, a tiak leina atan cheng vbc. 6.48 an sên tawh bakah link road laihna atan sum engemaw zat sen a ni bawk. Heti chunga mau puitling tha pakhat mah an phunna hmuna an sawi, Lengte leh Saitlaw ramah hmuh tur a awm miah lo hi mak kan ti a. Sawrkar sum awmze nei lova luanralna dik tak a ni," an ti.

Congress Thalai chuan, "A hunbi-a sawrkar hnathawk hlawh pawh pek theih a nih lo thin lai leh, CSS etc hnuaia thawkte thlabi hlawh pek that loh thin te, Tar pension leh rualbanlo (Vohbik) te lawmman pawh an batsak laia hetianga Sawrkar sum ho lam taka a luangral hi MPYCC chuan vanduaithlak kan ti a. Kan lo sawi fo tawh thin angin sum enkawl thiam lo Finance Minister Mizoram-in kan neih a pawizia a lo lang leh ta tihna a ni a. Tun hnuah hetiang project lem, tihhlawhtlin tumna tak tak awm lo hi kalpui ngai tawh lo tur leh sum siam nan maia sawrkar pawisa te hmang tawh lo turin MNF Sawrkar hi kan chah a ni," an ti bawk.