Aizawl January 16, 2023: Mizo Hnam Run chhung inkhawm vawiin khan nei a ni a, hun hnihna a thusawitu MNF President leh Chief Minister Zoramthanga chuan, MLA inthlan lo awm turah tling leh turin party dangte aiin advantage an nei tha zawk niin a sawi a, inthlan dawnah chuan chhungkaw nuai khatin SEDP an dawn hman a beisei thu a sawi bawk.

MNF President chuan sawrkar leh an inrin chhan sawiin, “MNF aia MLA nei tam an awm kan ring lo. Tunah hian hmun thuma thena hmun hnih MLA tha tak tak kan nei a, anni lan thei tur an awm lo. Kan MLA-ten bial an enkawl ngat ngat a, development scheme lokal tur leh SEDP nen party dangte aiin advantage kan nei tha zawk. Financial year tharah phei chuan SEDP thar nen, a dawng tawhte bakah inthlan dawnah meuh chuan chhungkaw nuai khatin an dawn hman ka beisei,” a ti.

Zoramthanga chuan ZPM chu ‘beih an ngai lo’ tia mite hmuh dan sawiin, “Beih an ngai lo, anmahni leh anmahni an inbei nasa, MLA chuh tum an inthuah nasa dawn hle,” a ti. "Kum 2018-a an boruak ang kha a ni tawh lo - Unit system kan duh lo, kohhran hi kan unit an ti a. Chief ministerial candidate hial an neite kha - ngaihzawng neih hma hawta fa hming sa lawk ang a ni. Inthlan zawhah erawh under 10-ah an awm chiang hle a nih kha. Tunah erawh chuan ECI-a inziaklutin political party dik tak an ni ta a, hmana (2018 inthlan lai) an ropui ang kha an ni tawh lo,” a ti.

Chief Minister chuan phurritin a delh thin chungchang sawiin, Sawrkar laipui nena inzawmna nei te, Assam border te, Burma atanga - kuhva, drug, refugee leh smuggling nen, party chhung inrelbawlna bakah sawrkar sum leh pai indaih lohna avanga hatsatna tinrengin a hlawma a tlakbuak chang chuan, "Lalpa rit ka ti hle mai," tia a tawngtai fo thin thu a sawi.

Finance enkawl thiam lova puhnate piah lamah sawrkar hlawh la tlai thin tihte chu sawifiahin central atanga fund lokal pangngai bak pawisa lokal pui ber chu share of taxes a nih thu leh hei hi thla laihawla lo thleng a nih dan tlangpui a sawi a. “A chang chuan kan loan lakte chu thla tirah voice record hmangin min rawn thing thin. Heng karah hian hlawh pek chhuah a ni," tiin, loan pawh an rulh zel thu Chief Minister chuan a sawi bawk.

“Pathian tanpuinain sawrkar kan siam leh ngei ka ring. Inthlana tling ngei turin i bei ang u,” tiin, MNF mipuite chu nghet taka ding turin a fuih a. "In hnenah ka awm zel ang" titu lam thlir chungin Pathian malsawm tlaka theihtawp chhuah turin party worker-te a sawm bawk a ni.

Inkhawm hi MNF Vice President Pu Lalthlengliana'n a kaihruai a, MNF Adviser Upa Zomuana'n hunserh a hmang a. He hunah hian 16.01.23 zinga lirthei chesuala boral Mohesh Baron Chakma (MDC), Charan Singh Chakma (MDC) leh Bono Sandro Tongchongya te sunna hun hman a ni bawk.