Aizawl: Nimin chawhnu dar 1:00 khan ZORO General Headquarters hruaitute leh Thangram Indigenous peoples movement hruaitute ZORO office ah inkawmna an nei a, R. Sangkawia ZORO President in a kaihruai a ni.

ZORO President R. Sangkawia chuan, "ZORO in a tum ber chu khawvel hmun hrang hrang a awm Zofate inlungrual leh inpumkhat a kan awm theih nan leh Zofate luahchin ram rorelna pakhat hnuaia awm hi a ni a. Keini ZORO chuan UNO kan dawr thin a, UNO atangin lehkha kan hmu tawh a, in luah chin ram Map lo siam ula in lo thehlut dawn a nia an ti a. ZORO chuan Zoram Map kan siam tawh a UNO ah kan thehlut tawh a ni," a ti.

ZORO President chuan,"ZORO hi political party a nilo a, Zofate inpumkhat nana bei tu a ni a, local politics ah hian kan in hnamhnawih ve ngai lo a ni. Thangram Indigenous Peoples Movement ten an duh kan hria a, tanpui theihna kan nei a nih chuan theihtawp kan lo chhuah ang," a ti bawk.

Thangram Indigenous Peoples Movement President K. Vana Chorei chuan, "Vawiina kan ram Mizoram kan lo kal hi thil dil tura lo kal kan ni lo a, kan nu leh pa te bel turin leh kan awmna hi Mizoram a ni tih lo puangzar tura lo kal kan ni a. Kan chenna Thangram hi Mizoram a ni a, hei hi Mizoram mipuite hian min lo hriatpui a, min lo pawmpui ve turin kan lo chho a ni," a ti a. "Kan ram ah hian rinawm takin kan lo ding tlat ang a, Zoram mipui hian min lo chhan ngam dawn em tih hi kan rilru ah a lian hle a, min lo chhan ngam ngei pawh kan ring a, kan hmuh dan pawh a ni. Mizoram mipuite ka sawm duhna chu kan za vaiin tangrual ila, Than-gram hi Mizoram chhung ah i rin lut ang u," a ti.

Thangram area ah hian Zofa chi peng hrang hrang khaw 24 a awm a. Thangram Indigenous Peoples Movement hi he lai hmun a Zofa chipeng hrang hrang ten October 2020 khan an din a ni.