Aizawl May 9, 2024 : Zo Re-unification Organisation (ZORO) chuan ni May 16, 2024 hian Zokhawthar leh Vaphai khuaah te India Sorkar in India leh Burma ramri hung (fencing) a tum duhlohna leh Free Movement Regime (FMR) thiah a tum duhlohna lantir nan Peaceful Rally neih an tum.

ZORO chuan peaceful rally neih an tumah hian Champhai DC, Sub Headquarter YMA Champhai te, Zokhawthar Village Council leh YMA te leh Vaphai VC leh YMA te pawh he an hmalakna turah hian hmalakpui turin biak an ni tawh tih an sawi a, Myanmar lama Mizo khua te pawh he hun hmanpui tur hian an sawm a, anni hi an rawn kal theih tur loh erawh an la chiang lo tih an sawi.

Zokhawthar-ah hian Peaceful Rally hi ram pahnih inkalpawhna Lei bulah neih tum a ni a, Vaphai-ah hi chuan a hmun tak tur an la sawi thei lo a, a remchanna hmunah hman mai zai an rel. he hunah hian mipui pawh an punkhawm that an ring a, khawtual mi chu sawi loh raltlan ringawt pawh Zokhawthar-ah hian mi sang sarih chuang an awm avangin mipui hi pungkhawm tha turah an ngai.

ZORO chuan Central Sorkar-in Free Movement Regime (FMR) tihtawp a tum leh Ramri hung (Border fencing) a tum hi a tawp thlengin a do dal zel dawn an ti a. UN Declaration on the Rights of Indigenous Peoples 2007 Article 36 (1) ah chuan, "Tualto hnamte, a bik takin khawvel Sawrkar ramri khamin a thendarh te chu an inkalpawhin an intanpui ang a, Sakhaw thil leh khawtlang thil, ei leh bar leh politics-ah te anmahni mi leh sa te nen inpawh a, sawiho theihna dikna chanvo an nei a ni." (2) Ram roreltute chuan Tualto hnamte nena inbe rawnin he dikna chanvote hi tipuitling turin hma an la ang." tih a ni, an ti.