ZALEN February 10, 2025 : Mizo Hnam Run chhung inkhawm vawiina neihah Leader of Opposition Lalchhandama Ralte, MLA chuan ZPM te hi anmahni thangkamah an âwk let dawn a ti.

MNF Legislature Party Leader ni bawk Chhantea chuan, February 8, 2025 a MNF Legislature Party ten Lengpui Airport an tlawh chanchin report a pe a. "Lengpui Airport hi kan ram rohlu a nih avangin ZPM sawrkar in midang kutah hlan tum mah se, theihtawpin kan dodal dawn a ni, a ti a. Kan ram mipui, NGO leh midangten kan duh loh thu kan aupui tawh hnuah sawrkar in chhuanlam fahrah te te siam a midang kut a hlan a tum tlat a nih chuan a tawp thlengin keini chuan kan do tlat dawn a ni," a ti.

Inrinni kalta a chanchinbu mite nen Lengpui Airport an tlawhah Mizoram sawrkar a GAD hotute be hmasa in, Lengpui Airport an tlawh hunah official lo awm se an tih angin an hriat duh an zawt tih a sawi a. Sawrkar Official zingah hian Kamrula a lo awm ve thu leh ZPM sawrkar ah a tlak-tlum viau an rin thu a sawi bawk.

ZPM ten MNF sawrkar chu AAI te nen inremna nei niawma an sawi chu chhangin, Chhantea chuan, "AAI hian MNF sawrkar ah Lengpui Airport kalpui an duhdan chu an thlen ngei a, mahse, MNF sawrkar chuan eng agreement mah kan ziah pui lo," a ti.

VC leh LC inthlan awm turah ZPM minister 3 te sawi dan a in ang lo theuh a, anni bakah ZPM Spokeman thusawi a dang leh bawk si a tiin, ZPM sawrkar chu buhfai, oil, stamp duty leh thildang man ti sang an nih piah lamah tunah Tui man tihsan an tum leh ni a hriat a ni a, ruihhlo ngai enkawlna-Jordan Centre pawh tihral an tum ni a hriat thu sawiin, hengte a vanga mipui tawrhna a nasat avangin mipuiin VC leh LC ah an vote loh phah a rin thu leh, Assembly Session awm turah auchhuah an tum tih a sawi.