DOWNLOAD OUR APP

Read latest news on your phone
app-store
ZPM buaina, Zo People’s Movement Legislature Party-a hming thlak dil? ; Assembly Speaker in thuthlukna la siam thei hrih lo
Nov 10, 2019

Aizawl: Assembly Speaker in Zoram Peoples Movement Legislature Party a pawm loh avangin ZPM chuan Zo Peoples Movement Legislature Party tia a hming thlak turin Speaker ah an dil a. Speaker in thutlukna a la siam lo thung.
Zalen thudawn danin Assembly Speaker in Zoram People’s Movement Legislature Party chu a din zel a remloh thu a hrilh hnuah ZPM hruaitu Lalduhoma MLA chuan ni 7.10.2019 khan Assembly Speaker hnenah lehkha thawnin ZPM Legislature Party chu awm chhunzawm tir turin a dil a. Mahse tunhnai khan ZPM hian Speaker hnenah lehkha dang thehlut lehin an Legislature party hming chu ti danglamin 'Zoram' tih chu thlakin 'Zo People’s Movement Legislature Party' an invuah thu leh an Legislature party chu pawm tura ngenna an thlen nia thudawn a ni.
Zalen zawhna chhangin ZPM Legislature Party Secretary Dr. Vanlalthlana chuan an hming thlak an dil chungchangah Speaker atangin engmah chhanna an la dawng lo tih a sawi a.
Tuna hming thar an dilna hi hlawhtling ta lo se engtia hmalak zel nge an tum? tih chu, "Tuna legislature party hming thar kan dil hi political party hming anpui nei lo a ni a, a phal lo a nih chuan a dan behchhan kan zawt leh ang," tiin a chhang a. Court a kal an tum leh tum loh chungchang chu tun dinhmunah chuan an la sawi mai theih loh thu Zalen a hrilh bawk.
ZPM Legislature Party hming thar pawm leh pawm loh chungchang chu Speaker thuneihna anih thu Assembly Secretariat thawktu te chuan Zalen an hrilh a. Zoram Peoples Movement chu political party anih tawh avang leh tuna ZPM MLA ni mek te chu Independent a ding vek an nih avangin an tan ZPM anga hming vuah chu dan atanga thlirin a rem lo a. Mahse hming thar an invuah chuan a remlohna awm lo turah an ngai tih an sawi. November ni 19,2019 atanga Assembly session neih turah pawh MLA te thutna tur chu tih danglam a la awm lo a ni.

Behind the scene
Assembly Speaker chuan ZPM MLA te inhlawmkhawmna ZPM Legislature Party (ZLP) chu a tirah a pawm a, mahse ZPM hi political party anih tak avang leh ZPM MLA te chu inthlanna ah Independent anga an chuh vek avangin ZLP chu a din zel a rem tawh loh thu September 19, 2019 khan a hriattir a. ZPM hotu Lalduhoma MLA chuan ni 7.10.2019 khan Assembly Speaker hnenah lehkha thawnin ZPM Legislature Party chu awm chhunzawm tir turin a dil a, mahse tunhnai khan an hming thlak hi an dil ta zawk a ni.

Latest News & Chhiar Hlawh